سوس ساويرس ينتشر ويتوغل

لماذا لا يصمت القديس نجيب ساويرس.. لسان زعيم زيرو اتناشر مستمر ف الهري والهرس الكلامي ضد الحكومة وتلميحات بخباثة هنا، وهناك ع النظام .. جنابه داخل أفية ماسخة ودور عند علي كبير.. ليه..؟؟ .. محدش فاهم.. جنابه رافض تطرية وتلطيف الجو.. حابب تسخين وكهربة كل الأسلاك خصوصا خصوصا الأرضية منها.. دايما بتباهى في قعداته: "أيوه أنا كده صعيدي ودماغي ناشف حتى مع الحكومة.. قلبي جامد ومايعرفش الخوف".. ساويرس داخل علي مرحلة مليانة ضباب.. ماشي ف سكة اللي يروج ما يرجعش.. ليه يا ساويرس.. كنت عاقل.. صابك إيه يا ولدي؟؟.. لطشك الغرور؟؟.. ولا ضربك الجنون؟؟.. شكلك كده مسّك عفريت.. جِن أسود شمهورشي ومتشيطن لزق بالقفا زغلل عينك وهزّ مركز نفوخك قلبك من بيزنسزجي وديع بيسمع الكلام لتاجر عياره فلت.. ارجع يا ساويرس.. العار ولا النار يا سوسو.. كفايك شطط يا بن الأستاذ أُنسي .. وساويرس مستمر ف قفلة المخ الصعيدي.. إمبارح بس، وخلال كلمته في مؤتمر الشرم الاقتصادي ب جلسة تعزيز الاستثمار ف مصر، ضرب كرسين في الكلوب، انتقد الأخطبوط قوانين "السيسي" وزايد ع الحكومة، وسعي بخباثة لإفشال تعزيز الاستثمار، مهاجما وزيري الاستثمار والكهرباء، مطالبا بتغيير معاونهما.. وشكرا ياعم سوسو.. لقد نفذ رصيدك.. لا تعاود النقد والهجوم ثانيا.. حاول الركنة علي جنب، أو تصحيح نقدك لاحقا.