خليك ف كوزك يا سوسو

ساويرس بيلعب ف عداد نهايته.. داير لافف على رِجل ونص ع النقابات في جو شو.. عينه عليها يا جماعة.. لف من ورا ودخل من الشباك في محاولة للسيطرة على قواعدها.. بدأ بالصيادلة واريح ع الحكما وف الطريق للمحامين والمهندسين.. ساويرس ماشي على خطى الجماعة اللي ماتتسماش.. بدأ مرحلة سورسة النقابات بعد أخونتها.. ملك الزيرو اتناشر بيلعب بالنار.. عين ع البرلمان وعين ع النقابة.. طموحه شاطح لفوق.. طمعان ف إيه ساويرس؟؟.. ف كرسي وزارة ولا كرسي محلب.. يخرب بيت عقلك الصعيدي لو الطمع شرخ للكرسي الكبير.. تبقى اتجننت رسمي يا سوسو.. لعلمك ولمخك الناشف ده، لا دستور ولا مندور يسمحان باللى هو ف دماغ جنابك.. نصيحة: خليك ف كوزك يا سوسو.. الاقتراب من اللغم خطر يا خواجة.. عنادك قد يكون مسمار نعشك يا ابن الأستاذ أنسي.. اسمع الكلام وهات ورا مرشيدير.. الاستمرار ف الانطلاق إلى الأمام بسرعة زائدة جنون يا سوسو.. هَدّي السرعة.. وعدّي المطبات والزم حارتك ف البيزنس وابعد عن حارة السياسة وغنيلها.. الوقوف قدّام القطر هبل يا سوسو.