اللعبة ...! عبد العزيز محمود

-الحق يا عتريس بيه!! رجالة شنبو بيه ورجالة الفرارجي بيه واقفين لبعض بالمطاوي والسكاكين والسنج وعايزين يشرَحوا بعض!!
فأسرع عتريس بيه سبع الليل ونحن وراءه في محاولة لفض الاشتباك قبل وقوعه: بس ياجدع منك له!! وحدوا الله..وصلوا ع النبي..ايه الموضوع يا رجالة ؟!
-يعني يرضي سعادتك يا باشا!! رجالة الفرارجي بيه يقولوا على شنبو بيه انه دراعك الشمال مش اليمين!!
فشخط عتريس بيه قائلا: ازاي الكلام ده!؟ ثم التفت سيادته الى الجانب الآخر وقال: صحيح يا فرارجي ؟!!! رجالتك قالوا الكلام ده!؟!!
- لأ طبعا ما حصلش!!!!دول رجالة شنبو اللي دايرين في كل حتة يقولوا ان الفرارجي هوه الدراع الشمال بتاع عتريس بيه!!
-ايه حكاية الدراع الشمال والدراع اليمين؟!!! انتوا الاتنين بالنسبة لي اكتر من ولادي!!! وانتو الاتنين عندي أغلي من بعض!!!
فقال شنبو بيه والفرارجي بيه في وقت واحد: يخليك لينا يا كبير ويطول لنا في عمرك قادر يا كريم!!!
-خلاص كل واحد يبوس راس اخوه ونقرا الفاتحة ان ربنا يهدًي سركم!!!
فتبادل الجميع القبلات وانتهت الخناقة لحسن الحظ قبل ان تبدأ ..
وبعد يومين ..
-الحق يا عتريس بيه رجالة شنبو بيه ورجالة الفرارجي بيه بيضربوا بعض بالشوم والنبابيت
-يادي المصيبة السودا..هوه ايه اللي حصل تاني؟
-ابدا الفرارجي بيه شخط في شنبو بيه وقال له الزم حدودك!!! ده انت يا يدوبك الدراع الشمال بتاع عتريس بيه!!!
-طيب وايه اللي استدعي الكلام الفارغ ده ؟!!
-اتخانقوا مع بعض مين اللي يقعد على يمين جنابك في حفلة عيد الأم!!!
-خلاص نلغي الحفلة طالما الموضوع بالشكل ده !! والا أقول لكم يلا بينا نلحقهم قبل ما يقطعوا بعض!!
وبعد أسبوع ....
-الحق يا عتريس بيه رجالة شنبو بيه ورجالة الفرارجي بيه بيضربوا بعض بالنار ورا المخزن الكبير!!
-يادي اليوم اللي مش فايت ....انا كان مالي ومال الشغلانة السودا دي؟ ما تفهموني يا رجالة هوه ايه الموضوع المرة دي؟!!
-ابدا سعادتك!! شنبو بيه داير يقول انه الدراع الوحيدة اللي سيادتك بتعتمد عليها!! وان هوه دلوقتي الكل في الكل !! بعد سيادتك وربنا طبعا!!!!
-دي للأسف غلطتي !! انا اللي اعتمدت الفترة اللي فاتت على شنبو أكتر من الفرارجي!!!
-بس ده يا كبير خلى دماغ الفرارجي بيه يضرب!!! وهوه كمان داير يقول ان البهوات اللي فوق وعدوه بحاجة حلوة أول ما سعادتك تسافر وتتكل!!!!
-ما أنتو عارفين يا رجالة انها لعبة !! واني بألاعب المهابيل دول وبأضربهم في بعض!!
لكن المعارك والخناقات والمشاجرات للاسف لم تتوقف فاقترحنا على عتريس بيه ان يفكر في حل جذري للمشكلة حتى لا تنتهي إلى كارثة!
فقال بعد تفكير عميق: خلاص يا رجالة أنا نويت بعون الله أرقي شنبو والفرارجي واديهم لقب "المؤتمن" قبل ما اسافر اتعالج م الزغطة اللي جات لي!!!!!!
لكن الاقتراح بكل اسف لم يحقق نتيجة ملموسة بعد ان استمرت الخلافات بين الرجلين حول من هو المؤتمن اليمين ومن هو المؤتمن الشمال لعتريس بيه!!!
-مالك يا كبير راجع من السفر ووشك مخطوف ومش متهني؟؟!!!
-أبدا شنبو والفرارجي زودوها قوي !! وواضح أنهم اتجننوا وبيلاعبوني انا شخصيا !!
-يبقى ما عدش قدام سعادتك غير انك توديهم في ستين داهية !!! خلينا نرتاح من الهم والغم ووجع القلب ده؟؟!!!
-للاسف ح ييجي غيرهم!!! وح نفضل نلف وندور في نفس الساقية !! ويمكن اللي ييجوا يكونوا ألعن وما أقدرش عليهم!
-طيب والحل جنابك!؟؟ما هو مش معقول تسيبهم يبرطعوا كده ويولعوا الدنيا !؟؟!!
-لاااااااا طبعا هوه انا نايم على وداني والا بأريل !!! ده انا عتريس سبع الليل والأجر على الله!!!!
-ح تعمل ايه سعادتك !!
-ح اطلعلهم الواد خبلانة اللومانجي يلاعبهم !! ما أنتو عارفينه لسه طالع من تأبيدة!! وبدل ما جوز الخيل طمعانين ف الكرسي بتاعي !! يبقوا يوروني ح يعملوا ايه مع خبلانة ورجالته!
-الله ينور عليك يا كبير!!! دا فعلا ح يبقى مولد وصاحبه غايب!!
فنظر عتريس بيه سبع الليل الينا بنظراته التي لا نقوى على مواجهتها وقال:
-أنا ما خدتش المكان ده وراثة و الا كوسة والا بضربة حظ!! أنا اخدته بدراعي اللي يا ما رفعت ناس وهبدت ناس ويتيمت ناس!!!!
-ربنا ياخد عدوك يا سيد الكل!!! ويخليك لينا قادر يا كريم!! شنبو والفرارجي دول شوية عيال وما يستاهلوش يعكروا مزاجك !!!
وهنا اتسحب الواد نخنوخ السنكوح ابو مخ كاوتش من لسانه وقال:
-بس العملية كده يا كبير ح تعُك ع الكل!!! وح نرجع تاني لأيام الخناقات والسنج والمطاوي وضرب النار!!
-ما تولع يا ابو قلب حنين والا تنهد على رووس اصحابها، انت عايزني أطاطي لشنبو والفرارجي ؟؟!!!