عن البساطة أتحدث..أحمد نبيل العريني

في البداية البساطة أساس الجمال، صورة حلوة بتدخل بروحك جواها، تعيش و تحلم.. حلم بسيط، توهان من نوع مختلف.. كلمة حلوة سمعتها من حد بتحبه، جايز الكلمة تكون عادية لكن بالنسبالك حياة، الكلمة بتغيّر حياة، ممكن تكون زعلان و في لحظة تنسى الزعل خالص و تبتسم.. لحن بتفضل تعيده من حلاوته، صوت بتحب تسمعه، وردة شكلها حلو، ضحكة طفل، كلمة بحبك.. حاجات بسيطة بتغيّر يومك و ممكن تغيّر حياتك بالكامل.
مؤخرًا بقينا بنتعامل مع بعض بنوع من الغرور، نوع من الغيرة.. كل واحد عاوز يشوف نفسه و بس، مايهمهوش اللي حواليه.. أعرف زمان حد قال لي "يا ابني زمانكوا غير زماننا، إحنا اللُّقمة كانت بتكفينا وتفيض لكن إنتوا ممكن تاكلوا بعض" تقريبًا 80% من كلامه صح، بقينا بناكل بعض بدون ما نحس، بقينا بنتخلى عن بساطتنا ونتشعلّق في التباهي بمالنا و جمالنا، بقينا مُصطنعين بشكل مبالغ فيه، كل همنا ندوّر بس على المصلحة ولو مجتش نجري وراها، دايرة وكلنا بندور فيها و اللي بيكسب النهاردة بيخسر بكرة، واللي قاعد يفكر في المال والمنصب نهايته بتكون حزينة، عايشين في دايرة، بنشوف بعض من تحت النضارة، لو شوفنا بعض بعيوننا البسيطة هتظهر الحقيقة، هيظهر الجمال.
البساطة إنّك تكون عايش مش فارق معاك فلوس ولا جاه ولا مصلحة، تكون عايش ملك من غير ما تفكر في اللي يفسد ملكوتك واللي يغيّر عالمك من عالم جميل لعالم حزين و مُمل، البساطة جايز تكون كلمة عادية جدًا لكن لو ركزت فيها هتحس بالسعادة، أصلًا السعادة في البساطة.. حب و إتعلّق بس تعامل ببساطة، الحب يضحكلك.. عيش الحياة بقلب بسيط، بروح تشوف البساطة في عيون الناس البسيطة، في عيون أب بيجري ليل و نهار عشان يوفّر دخل كويس لولاده، في عيون أم بتركز و تهتم و تسعد ولادها، في عيون طفل مش فارق معاه حاجة، غير إنه يلعب لعبة جديدة، البساطة لا تُشترى البساطة بتتولد جوانا و مع الوقت يا بتكبر و تزيد و تنوّر حياتنا، يا بتقل و تبدأ دايرة الحياة تلف جوانا وتتوهنا من نفسنا.. تعاملوا ببساطة تسعدوا وتشوفوا الحياة بعيون جميلة.