حصاوي والذكرى العطرة

المواطن الغلبان حسن حصاوي يغشي عليه من حين لآخر، وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشي عليه.
جاءت جلسة حصاوي هذا المرة بجوار شاب في أول العشرينات وكان يبدو عليه الحزن، وكان بين الحين والحين يتمتم.
الشاب آه يا بلد...وآه وآه.
حصاوي مال عليه قائلا وحد الله.
الشاب لا آله إلا الله.وإنا إليه راجعون. اللي قاهرني أنه مات في عز شبابه.
حصاوي ادي حال الدنيا. أكيد كان زميلك.
الشاب كان أكتر من كده بكتير، كان حبيب الكل.
حصاوي حبيب الكل ؟ غريبة.
الشاب إيه اللي غريب؟.
حصاوي إلإ بقي إذا كان قريبك ؟.
الشاب أكتر. كان أبويا. وأبونا كلنا، كنا عايشين بحسه.
حصاوي لا دي فزورة بقي.
الشاب "مستنكرا" أخص على كده، مش عارف بتكلم عن مين؟ ولا عشان مات من أربعين سنة, نقوم تنساه، آه يا بلد دا كان خسارة فينا، وأنت يا للي كبير في السن مش عارف؟ ما شوفتوش ولا سمعتوش؟.
حصاوي طب وأنت يا صغير سمعته وشفته أمتى؟.
الشاب شفته فيديو.
حصاوي معلش أصل أنا عندي زهايمر. مين هو بقى؟.
الشاب البطل ..الملهم ..الزعيم الخالد اللى دوخ أمريكا وإسرائيل والغرب كله ونصرنا عليهم كلهم.
حصاوي أوعى تكون تقصد صدام حسين ولا العقيد القذافى.
الشاب عبد الناصر يا بني آدم. تنكر أن هو اللى أسس مصر الجديدة ..مصر الثورة ؟
مصر الاشتراكية ؟ مصر المنتصرة.
حصاوي الحقيقة أنا زيك شفته في التلفزيون بس.
الشاب وأبوك ما كلمكش عنه.
حصاوي اتكلم بس متأخر، أصله مشي في جنازة النحاس فخدوه واعتقلوه هو واللي مشيوا في الجنازة.
الشاب وهو ليه يمشي في جنازة النحاس؟.
حصاوي ( بقلق ) طبعا كان غلطان.
الشاب ومش أفرجوا عنه بعد شويه؟.
حصاوي فعلا ما قعدش كتير بس بعد شوية طردهم مع القضاة اللي رفدهم.
الشاب فهمت تبقي أنت من فلول الرجعية.
حصاوي عموما أبويا مات بعده بشويه صغيرين وأنا طلعت ما ليش في السياسة.
الشاب أحسن.
حصاوي بس أتجندت في الجيش طبعا.
الشاب في اليمن ولا في سينا؟.
حصاوي في الاتنين خدونا من اليمن على سينا بس الحمد لله هربت من المعركة.
الشاب ومش مكسوف تقولها ؟.
حصاوي ما هو ما كنش فيه معركة في سينا هما سابونا نجري عشان ما نموتش وكان حظي حلو عشان ما أموتش فطيس زي زمايلي بس اللي ماتوا مش كتير يعني حوالي ميت ألف بس.
الشاب أنت من الأعداء اللي كانوا ضد الزعيم وبيطلعوا عليه إشاعات؟.
حصاوي أنا بقول لك حوالي ميت ألف بس الحقيقة ما حدش قال لنا اللي ماتوا كام واحد لحد
دلوقت، إنما أنت حزين قوي كده ليه؟.
الشاب عشان اللي حضروا ذكراه المرة دي كانوا عدد قليل.
حصاوي بس أكيد محمد حسنين هيكل كان موجود ودا لوحده كفاية.
الشاب لا .ما شفتوش.
حصاوي يمكن كان بيسجل في التليفزيون أحاديث عن حياة عبد الناصر لحد النهار دا بس أكيد كان فيهم حمدين صباحي ع الأقل.
الشاب لا حتى هو ما جاش أمال أنا حزين ليه؟.
حصاوي معقوله برضه. تلاقيه مشغول بانتخابات مجلس الشعب وخاف يروح المرة دي تتحسب ضده.
الشاب ليه بقي؟
حصاوي لأن كان نفسه يترشح لوحده زي البطل ما كان بيعمل وكانت النتيجة أنه طلع التالت قولي ولا حد من أسرة المشير عبد الحكيم عامر حضر الذكري؟.
الشاب أبدا.
حصاوي معقول برضه ما هو الزعيم وهو عايش مارحش يزور قبر عبد الحكيم وطبيعي أهل عبد الحكيم ما يطلعوش على قبر الزعيم.
الشاب أنا مش متأكد من دي. لكن جايز يكون راح يزور تربته.
حصاوي لأ مش ممكن لأن أسرة المشير رفعوا قضية على عبد الناصر من تاني يوم لوفاته لكن ولا حد من اللي حكمونا زمان أتجرأ وسمح للمحكمة أنها تنظر القضية و لحد دلوقت، لكن هما المره دي مصرين وعندهم أمل المرة دي تتنظر.
الشاب أشمعنى دلوقت ؟ ويرفعوها ليه ؟.
حصاوي لأنهم بيقولوا أن عندهم براهين مؤكده أن ناصر هو اللي أمر بقتل أبوهم بالسم.
" الشاب ينظر له بغضب ثم يغشى عليه"
تعريفات حصاوي
الفن عندنا
بعض المطربين عندنا :
** المطرب الذي نستمع له، هو الذي يلبس أجمل الملابس المزركشة فنأخذه قدوة!.
بعض المطربات عندنا :
** واللاتي نحب أن نسمعهن بشغف، هن اللاتي يلبسن أقصر
الملابس, فتسحرنا !.
** الممثل النجم هو :
الذي يتحرش بباقي الممثلين والممثلات أمام الجمهور،
فيقولون له ..أتحرش كمان !.
الفيلم الفاشل :
** هو الذي لا يمتلئ بالسباب والضرب و الذبح والدعارة، ولذلك
لا يستحق مشاهدته!.
بعض كتاب الكوميديا عندنا :
** يكتب كل ما يمليه عليه الممثل بالحرف !.
بعض الممثلين عندنا :
** يعيد تأليف المسرحية وإخراجها وهو يمثلها يوميا بشكل
آخر،لأن كل ممثل خلاق!.
بعض المخرجين عندنا :
** يخرجوا فيلما أو اثنين، ثم يخرجون من حياتنا...بناء على
رغبة الجمهور!.