حب مراتك النكدية

مراتك نكديه أنا عارفة.. ومبهدلة في روحها والله العظيم مصدقاك.. وطول النهار عماله تجعر في العيال وأمة لا إله إلا الله سامعه صوتها صوتها واصلنى لحد هنا... بس أنا حسألك كام سؤال على الماشى.. مش مراتك دى هي نفسها اللى كنت حتموت نفسك علشان تتجوزها فاكر لما كنت بتتخانق مع مامتك علشان مصممه تجوزك بنت اختها ونشفت دماغك يا مراتك يا بلاش ماهى نفس الست ايه اللى جرى يا راجل يا طيب.. طيب فاكر لما كنت بترغى معاها بالساعات في التليفون وتبقى مزقطط انها بتكلمك والحاج يتخانق معاك على الفاتوره طيب بتاكل سد الحنك ليه أول ما تدخل من باب الشقه وتهز راسك كل ما تكلمك ماهى نفس البنى ادم ايه اللى جرى.. طب بذمتك يا شيخ مش كنت هتموت من الفرحه وانت بترقص معاها يوم الفرح علشان أخيرا ربنا حقق حلمك اومال مش طايق تبص في وشها ليه ماهو نفس الوش...انا سمعاك وانت بتقول كنت مجنون لأنها اتغيرت وبانت على حقيقتها بوز النكد بس الحقيقه انها ما اتغيرتش انت اللى غيرتها قلبتها من البنت الرقيقه العسوله ام دم خفيف لخالتى اطاطا غيرتها بجموديه قلبك وتريقتك عليها والحمل اللى رميته على كتافها بعد ما قولتلها كل الستات بتعمل اكتر منك لما ما سمعتش شكوتها وهانت عليك دموعها... اقولك جرب تتغير وشوف ايه اللى هيحصل متتريقش على بطنها اللى كبرت دى والده مرتين قيصرى يا مفترى وانت بتاكل محشى الكرنب بتبقى زى خزان الميه.. بلاش وانت بتتفرج على التليفزيون تقولها ادى الستات ولا بلاش..الستات اللى في التليفزيون مش بتناول نفسها كوبايه ميه ومراتك ولا الفليبينيه..و بعدين ما انت كمان كرشت واقرعيت وبقى شكلك عجيب بس هي بتحبك زى ما انت ومش شايفه غيرك..
قولها والله وشك احلو لما زدتى عاوزين نعمل رجيم.. قولها صباح الخير الصبح وتصبحى على خير وفي نص اليوم أخبارك إيه.. بلاش طلبات غلسه الشراب الكحلى زى الشراب الأسود متحبكهاش وتعمل خناقه البس اللى تلاقيه في الدرج لو ولادك بيبيهات شيلهم حتى لو بيعيطوا ولو في مدارس ذاكر لهم وورينى جدعتنك أنك متزعقش لما تلاقى الغباوة معبيه براميل.. طبطب عليها الستات بتحب الطبطبه قولها بحبك هي هبله وبتصدق.. الورده ب3 جنيه هاتلها وردة مرة في الأسبوع احتمال كبير تجيلها سكتة قلبية وتخلص منها بطريقة مفيهاش شبهات!