. حينما تكون لغة الكلام معطلة

فاكرين إعلان الست اللى بتضرب جوزها على كتفه وهما على المصيف وبتقوله «إنت ما بتجريش ورايا كده ليه؟» لما شافت واحد ومراته بيجروا ورا بعض؟ وطبعا السبب اللى الإعلان روج له أن الست اللى جوزها بيجرى وراها كانت رشيقة عشان بتاكل زبادى لايت والتانية تخينة هى وجوزها.. كلام إعلانات طبعا، جوزك مش هييجرى وراكى على البحر حتى لو انتوا الاتنين رفيعين وما بتاكلوش زبادى أصلاً.
أعتقد إن الجرى ورا الزوجة، أو العكس حتى، يشبه إلى حد كبير الحوار بين الزوج والزوجة، فمهما غيرتى موضوع الحوار فمش هيتكلم وهتلاقى نفسك بتقولى له: «إنت ما بتتكلمش معايا ليه؟» فهو مبدأ يا عزيزتى، لن تفلح معه نصائح أصدقائك الرجال الذين ستسألينهم: أعمل إيه عشان جوزى يتكلم معايا؟ اللى هيقولك «كلميه فى الكورة أو العربيات» أو «شوفى اهتماماته ايه» أو حد تالت يقولك «بلاش حوارات النكد اللهى يسترك.. مش كل الكلام فى مشاكل البيت والعيال» واحد صايع ممكن يقولك «كلميه فى قلة الأدب.. كلنا بنحب الكلام ده» ويبتسم ابتسامة بلهاء.
(2)
طبيب نفسى فى تعليقه على أهمية الحوار بين الزوج والزوجه قال إن: «الحوار مهم عشان تفضل محافظ على حب زوجتك وعلى هدوئها النفسى» وعلى فكرة ده دكتور مصرى -جمال شفيق أحمد أستاذ الطب النفسى بعين شمس- عشان ما تقولوش كلام الأجانب ما يمشيش علينا هنا.
(3)
صديق رفض ذكر اسمه عشان مراته ما تزعلش من الكلام اللى هيقوله لما سألته «ليه مش بتتكلموا معانا؟» قال لى: أنا هاتكلم أما أكون عايز اتكلم، مش عشان لازم أقدم تقرير عن يومى.. ده غير إنها بتحاسبنى لو ما حكيتش عن حاجة معينة، مثلاً: أنا لما باحكى لواحد صاحبى إنى سبت الشغل من أسبوعين ونقلت شغل تانى مش هييجى فى باله يسألنى «ما قلتليش ليه مع إننا اتقابلنا يوم الأربع»؛ لأنه فاهم الحقيقة ببساطة أن الكلام جاب بعضه، أما مراتى فهتقولى: ليه ما قولتليش يومها؟
سألته: ليه بترغوا مع أصحابكم أكتر مننا؟ مع إن الواحد منكم يبقى قاعد متنح وساكت ف البيت وأول ما تيجى له مكالمة من صاحبه تلاقيه كله حيوية ونشاط؟
قال لى «عشان ده بنى آدم جديد وأن الكلام بيجيب بعضه، وكمان فيه اهتمامات مشتركة».
سألته: امممم.. إنت شايف إننا مملين يعنى؟
قال لى: لا خالص بالعكس الستات مسليين.. لكن الموضوع إجمالا متعلق بالتوقعات.. يعنى الست بتبقى مستنية حاجات وبتطلع حاجات تانية.. زى إنها تكون فاهمة أن معرفة التفاصيل حق.
أنا: ما هى حق طبعا.. إييييييه؟
(4)
ما دام معرفة التفاصيل مش حق.. يبقى إنتِ كمان ما تقوليش كل التفاصيل.. هو ده اللى بيشدنا للراجل، بنبقى عايزين نعرف ساكت بيفكر فى إيه؟ حصل إيه انهاردة فى شغله؟ كلم مين؟ وبالرغم من محاولاتك المستميته للمعرفة، لكنه ما بينطقش ويمكن ده اللى بيزود فضولك.. فالحل ببساطة إنك ما تعرفيهوش كل حاجة عن يومك ولا مشاويرك حصل فيها إيه.. خليكى منغلقة على نفسك زيه.. عارفة عارفة إنه صعب.. بس يمكن نقدر نخليهم يهتموا، وييجى اليوم اللى تلاقى جوزك عمال يحاورك ويسألك ويقولك إنتى ما بتتكلميش معايا ليه؟
(5)
نصيحة للبنات المخطوبين أو المرتبطين.. ما تتفرجوش على أفلام كتير خاصة مشاهد الجرى على البحر، أو إنه يجيب لك أوضة كلها بلالين فى عيد ميلادك عشان الصدمة هتبقى كبيرة.