كلمتين محشورين فى زورى لكل راجل بيقول لمراته انتى سايبانى و قاعده على الفيس. ..احب اقولك ان اكيد الفيس اظرف، عارف ليه ؟؟ لانها لما صحيت الصبح الساعه خمسه تجهز الولاد للمدرسه حطت صوره ورد و قالت صباح الخير قام جيش الامهات صاحباتها قالولها صباح الورد و الهنا و الفل و الحلويات بس لما انت صحيت قالتلك صباح الخير قولتلها جهزى القميص الاخضر ابو ياقه مشمشى و اوعى يكون لسه فى الغسيل. ..لما عملتلك فرنش توست على الفطار صورته و كل صاحباتها قالوا ما شاء الله تحفه يجنن تسلم ايديكى و انت قعدت زلطته على بق واحد و مخدتش بالك غير انها محطتش غير معلقتين سكر فى اللبن ..انت نزلت و سبتها بين اربع حيطان روقت البيت و طبخت و نشرت و جربت تكلمك تقولك اخبارك ايه ؟؟و انت رديت عليها الرد المعتاد خيررررر يا ماما انا فى الشغل؟ فردت هى متنساش تجيب اكياس زباله و انت جى بس لما دخلت على الفيس اصحابها قالولها عامله ايه و حشتينا و رغوا و ضحكوا و هزروا و لما عملت وصفه الغدا اللى خدتها من على النت علشان تغديك و لا اى اندهاشه كانك بتاكلها كل يوم و لما قالتلك دى وصفه جديده قولتلها حلوه بس زودى الملح ...و هى بتذاكر للولاد و قالتلك تعال فهمهم دى قولتلها انا طول النهار مصدع اتصرفى سالت اصحابها فى الجروب شرحولها و فهمت الولاد و لما وقعت رجليها و هى رايحه توديهم التمرين و حضرتك نايم و جت حكتلك قولتلها انتى زى القرده بس اصحابها ادوها اسامى كريمات و جاتلها 120 رساله الف سلامه عليكى و بعدها بساعتين 100كومنت عامله ايه دلوقت. . و بعد ما شطبت المطبخ و حمت الولاد و عشت حضرتك دخلت تنام قولتلها ايه ده مش حتقعدى معايا انتى طول النهار فاضيه بتعملى ايه مفيش غير انك تقوليله و لا حاجه انت بتنزل من هنا و بفتح حنفيات الشقه و البس المايوه انا و الولاد نعمل باليه بحيره البجع و لما يقولك انتى مش فاضيه غير للفيس يبقى ساعتها الشيطان بيهديكى علشان ما تجيبيش الساطور من درج البوفيه التحتانى. .عزيزى الزوج الحاجه الوحيده اللى مش مخليا البيت يتخرب هى الفيس ...فيا تبقا زى اصحابها يا تسيبها تفك معاهم بدل ما تفرقع فيك انت و العيال ..و على فكره محدش قال انك مبتتعبش و لا بتشقى بس خد و ادى معاها فى الكلام و المصحف مراتك ظريفه جدا و دمها خفيف و دماغها حلوه كلنا بناخد رايها و بيطلع صح !