صناعة الأزمات.. فن

وزير التموين الجديد نزل من قطار البرلمان وركب قطار الوزارة ويدوب »القطر»‬ اتحرك وراحت دماغ الوزير شغاله علي طول، طيب اللحمة الناس كرهتها بسبب الغلا وحرمتها علي عيالها، والفراخ الناس زهدتها وبطلت تفكر فيها بعد الكلام عن تعاطيها حبوب منع الحمل مع العلف وأمراضها اللي ما بتخلصش اشي انفلونزا طيور واشي كوكسيديا ونيوكاسيل وحاجات غريبة ما كانوش بيسمعوها زمان.. يبقي فاضل في التموين ايه، فاضل المقررات التموينية وأرغفة العيش، نبدأ بالزيت والسكر نخلي لتر الزيت اللي هو أصلا 800 جرام وبنبيعه علي أنه كيلو نزود سعره من 7 إلي 8 جنيه والسكر نخليه ب10 بدلا من 9 جنيه ونقلل الكمية ونشوف، الناس صرخت شويه في الفضائيات وبس.
كده طيب نشوف العيش، الناس مبسوطة والأشيا معدن والمنظومة جميلة وموفرة العيش للناس كلها وما فيش مشاكل، طيب وهو ده ينفع برضه؟! لازم نشوف الحكاية ايه، قالوا ان حصة الدقيق بتكفي المخابز للي معاه بطاقة ياخد العيش واللي ممعهوش ياخد برضه بالبطاقة الورقية ما هي لها حصة دقيق، واللي ممعاهشي لا دي ولا دي ياخد عيش حر ناس بتبيع الرغيف بعشرين قرش وناس بتبيعه بربع جنيه، طيب نعمل منظومة جديدة يقوم تحصل ازمة ويبقي فيه شكاوي وتصريحات وحركة كده،، أصحاب المخابز ما صدقوا وراحو رافعين ثمن الرغيف خارج البطاقة إلي 75 قرشا، طيب وبعدين؟ عادي اللي ما عندوش بطاقة ياكل مكرونة ما هي برضك مصنوعة من الدقيق.