فيسبوك: برلمان حب يعمل قانون العزل.. اتعزل هو

"يعني شفيق طلع دستوري ومجلس الشعب طلع غير دستوري.. حكمتك يارب!!".
تباينت ردود الأفعال على الفيس بوك حول صدور حكم المحكمة الدستورية العليا ببطلان قانون العزل بما يسمح لأحمد شفيق بالاستمرار في سباق الرئاسة منافسًا لمحمد مرسي، وبطلان ثلث أعضاء مجلس الشعب علي المقاعد الفردية، حيث سريعا ما انطلقت التعليقات الساخرة على الموقع..
أنا خايفة ليكون الثلث ده هو اللي مش إخوان في البرلمان.. ساعتها المجلس كله هيبقى اخوانجي
الحكم ناقص حته عارفين هى أيه "رسالة من المجلس الأعلى للقوات المسلحة لجماعة الاخوان المسلمين: شكراً لحسن تعاونكم معانا طيلة العام ونصف الماضيين ونراكم فى السجون بعد فوز شفيق قريباً جداً".
أحلى حاجة في مصر أن الجيش والقضاء حموا (الصورة)
الشعب ده اتكتب عليه طابور العيش وطابور الأنابيب؛ وأضيف إليهما طابور الانتخابات والحبر الكوبيا.
مبروك على كل مصرى إما السجن أو القتل أو التشريد أو الموت بسرطان أو جلطة أو فشل كلوى أو غيره بقى من اللى لسه مانعرفهوش
الجزاء من جنس العمل اشربوا بقى زى ما سبتونا واتخليتوا عنا فى الميدان أدينا ضعنا كلنا
لقد وقعنا في الفخ
ده المتوقع ومعروف من زمان اووي (مصر دولة عسكرية) لا مدنية و لا إسلامية .. والعسكر مش ح يسيبوا البلد
شفيق أمامنا.. والعسكر وراءنا لا و لابس جديد في جديد
عيان بيضرب ميت لا ده حاسس ولا دة مستكيف
كل سنو وأنتم طيبين كانت ثورة حلوة والله.. وانا كعاطف اتبسط!
اللي أولها "سلمية" تخلص في "الدستورية"
النسبة لان فيه مرشحين فى الرئاسة جايين ب30 توكيل من مجلس الشعب اللى تلته هيتحل ده ... مش مفروض دول يعيدوا الانتخابات بقى ولا ايه ؟!
يا مصر لو نيلك صلصه مش هيكفي الكوسه اللي فيكي
تانى تانى تانى راجعين انا وانت وكلنا تانى للميدان التحرير تانى
طب ما يرجعو الحزب الوطني بالمرة
نقطة. ومن أول السطر
الشعب هيتحل كله ولا حته منه.. حته منه ولا كله
بيقولك مرة برلمان حب يعمل قانون العزل... اتعزل هو
العزل زي الشتيمة بتلف تلف وترجع لصاحبها
الثورة المصرية مواقف وطرائف.