اخبار الدراما : كله بالحنيه بيفك .. شعار دراما رمضان 2013

رمضان خلص وكل سنه وانتو طيبين وبصراحة مكنتش عايز أتكلم عن دراما رمضان السنه دي عشان كل سنه بكتب الناس بتزعم مني وساعات الموضوع بيوصل لحد القضايا بس مش مشكله انا هكتب واللي عايز يزعل يزعل وكلها عارفه بعضها
* مسلسل "العراف " اثبت ان الزعيم يستحق اللقب عن جداره واستطاع ان يمحو خطايا "ناجي عطا الله"
* ريهام ايمن تستحق النجاح فهي تمتلك مقومات النجوميه .
* ما قدمه احمد فلوكس في شخصيه البورسعيدي يفوق جرماً مذبحة الالتراس في ستاد بورسعيد وهو ما يتطلب تدخل سريع من النائب العام حتي لا يكرر ما فعله مره أخري .
* ظهور نجم بحجم حماقي لمده لا تتعدي 30 ثانيه في مسلسل "العراف " يؤكد ان الفلوس بتعمل اي حاجه.
*مسلسل " الكبير قوي 3 " ليس له اي محل من الأعراب سوي ان مكي حاول ان يعوض ما حدث في فيلم "سمير ابو النيل " واستخدم كل شخصياته حتي "حزلقوم " بس الموضوع وسع منه قوي .
* الكل كان متوقع ان باسم يوسف لو فكر يمثل هيكسر الدنيا بس بعد ظهوره في مسلسل " الكبير " الكل اجمع ان كفايه عليه تقديم البرامج .
* مسلسل "حكايه حياه " لو تجاوزنا عن الألفاظ الغير لائقة وخناقه وردح وبلطجه وقضايا المخرج محمد سامي والممثلة غاده عبد الرازق وصريخ روجينا وقمصان نوم نجلاء بدر يبقي خلاص مفيش مسلسل نتكلم عنه أصلاً بس ربنا يكتر فلوس "CBC ".
* مسلسل " مزاج الخير " يعكس مدي حاله الانحدار التي وصلنا إليها وان لا يوجد ما يسمي بحرمه الشهر الكريم ولا دراما نظيفه ولا رقابه علي الأعمال واللي عايز يعمل حاجه يعملها بس كان في ممثل عمل دور في فيلم "مافيا " و مسلسل " الحاج متولي " اسمه مصطفي شعبان قالولي انه في المسلسل بس مالقيتوش هو اعتزل ولا ايه ؟؟
* مسلسل " الوالده باشا " كان مباره فنيه بين ثلاثه من غيلان التمثيل سوسن بدر وباسم سمره وعبير صبري التي تفوقت علي نفسها في الوالده باشا لتؤكد أنها نجمه تحمل ألف وجه وبالفعل هي " علمت " علي ناس كتيير بالدور ده .
* مسلسل " اسم مؤقت " بطوله المخرج احمد نادر جلال والسيناريست المتألق للعام الثاني علي التوالي محمد سليمان ومشاركه متميزه لشيري عادل وظهور خاص ليوسف الشريف.
* مسلسل " الرجل العناب " محاوله جديده في الدراما تحسب للثلاثي احمد فهمي وهشام ماجد و شيكو بس كان لازم المنتج يفك كيسه شويه عشان الموضوع كان شكله يصعب علي الكافر .
* مسلسل " ذات " فاصل من العزف لاوركسترا بقياده المايسترو كامله ابو ذكري مع فاصل من العزف المنفرد للنجمه نيللي كريم . مسلسل " الشك " تألق غير عادي لصابرين ورغده وحسين فهمي ونضال الشافعي وتوهان غير عادي لمي عز الدين وإداره ناجحه لمحمود شميس .
*مسلسل " العقرب " لدغ كل من سولت له نفسه مشاهدته واكد منذر لكل جمهوره انه قدامه كتيير قوي عشان يعرف يتكلم مصري .
*مسلسل "بدون ذكر أسماء " يواصل فيه العملاق وحيد حامد تالقه وان كنت أتساءل هل وافق نجوم العمل علي تيتر البدايه الذي يحمل اسم احمد الفيشاوي فقط ؟؟
* مسلسل " الداعيه " أعاد هاني سلامه لنجوميته التي افتقد منها الكثير واكد ان المخرج الشاب محمد العدل " ماندو " مخرج له رؤيه وامتداد متميز لاسره العدل .
* مسلسل " نكدب لو قلنا مبنحبش " ليسرا ومسلسل " نظريه الجوافه " لإلهام شاهين ومسلسل " حاميها حراميها " لسامح حسين ومسلسل " خلف الله " لنور الشريف ومسلسل " نقطه ضعف " لجمال سليمان " راحوا في الوبا زي هنادي " بس العيب علي القنوات اللي بتشتري .
* فوازير " مسلسليكو " لمحمد هنيدي محاوله جيده للعودة للكوميديا بس كان ايه لازمه الغنا والاستعراض في كل حلقه .
*مسلسل "فرح ليلي " جعل الكل يتسائل لماذا لم تعتزل ليلي علوي التمثيل للحفاظ علي رصيدها اللي عملته بعرقها في سنين وبضيعه في مسلسلين زي " أيام وبنعيشها و " فرح ليلي " .
*مسلسل " ميراث الريح " ذهب ولم يعد واعتقد ان التلاته اللي اتفرجوا عليه بيتعالجوا دلوقتي في مصحه نفسيه .
* مسلسل " فرعون " يؤكد ان خالد صالح ممثل عبقري في السينما بس بلاش الدراما عشان الموضوع صعب علينا قوي وكفايه اللي بيحصل في البلد .
* مسلسل " فض اشتباك " نجوميه احمد صفوت وجمال السيناريو وإبداع المخرج المنتج وقريباً الممثل احمد نور يلفتون الأنظار من اول وهله " ايه رأيكم فيا وأنا بكذب " بصراحه انا معجبنيش في المسلسل غير إيهاب فهمي بس مفهمتش منه حاجه ! يالا بلاش نجيب في سيره الناس وكل سنه وانتوا طيبين .