فنانة محبوبة، قدرت تثبت نفسها في أدوار كتيرة، خلت ليها جمهور كتير بيستنى أعمالها دايما، قوية الشخصية، ودايما بتقابل الانتقادات الكتيرة اللي بتتعرض ليها بابتسامة، وبتفضل ترد بعمل فني جديد، يضيف لرصيدها الفني، شفناها كلنا في رمضان اللي فات وهي بتأدي دور قوي ومؤثر بمنتهى الصدق، فأمتعتنا وأبكتنا في نفس الوقت، تعالوا نقرب منها أكتر عشان نعرف مين هي داليا البحيري. تعرفي إيه عن داليا البحيري ؟ أنا مابتفرجش قوي على داليا البحيري، مش هقدر أفيدك، أنا مش من جمهور داليا مابحبش أتفرّج على نفسي. كلمينا عن تجربة ريش نعام؟ فكرنا نعمل فكرة جديدة، بتحكي عن شخص غني بيفتقر، أنا كنت عايزة أعمل قصة الأميرة فتحية، بس لقينا إنه إنتاجيا هيبقى صعب؛ لأنه زمن غير الزمن، فقلنا نعمله حاجة مودرن. المسلسل طبيعي جدا عملتوا إيه عشان توصلوا لكده؟ هي حالة عامة جت للناس كلها، وأكيد الفضل يرجع لأستاذ خيري بشارة المخرج، لأنه هو اللي عمل المود العام للشخصيات. إزاي قدرتوا تظبطوا التفاصيل بالشكل القوي ده في المسلسل؟ ده بيبقى راجع للمخرج، وأستاذ خيري بشارة من المخرجين القلائل اللي بيهتموا بالتفاصيل الصغيرة، لأنها هي اللي بتطلّع الصورة الكبيرة بشكل أحلى. تدّي لنفسك كام في المية على المسلسل؟ ما أقدرش أجاوب على السؤال ده خالص، لأن ده يرجع لرأي الناس اللي شافوا المسلسل.. ممكن حد يديني نسبة عالية وممكن العكس، وأراهنك إن أي ممثل يقدر يقيم نفسه. لو هتمثلي دور تاني من أدوار المسلسل هتختاري إيه؟ فيه أدوار كتير عجباني، زي دور كريم الشرقاوي، ودور الأب، ودور دينا اللي عملته نجلاء بدر، ودور الأم اللي عملته مادلين طبر، لأن كل الأدوار مكتوبة بشكل حلو جدا، ومليانة تمثيل، ودي ميزة المسلسل. حاسة بإيه بعد ردود أفعال الناس على المسلسل؟ مبسوطة جدا، لأني ماكنتش متخيلة إننا هنتشاف بالشكل ده في رمضان، واتخضيت لأني لقيت إننا متشافين كويس قوي، وتعليقات الناس بسطتني جدا، وكمان جاني تعليقات حلوة جدا من زمايلي الممثلين. ماكنتيش قلقانة من غيابك سنة ورجوعك في زحمة مسلسلات رمضان؟ أنا ببقى قلقانة من أي عمل جديد، بس بسيبها على الله، وبقول لكل مجتهد نصيب، وبراعي المشاهد في أي حاجة بعملها، وده طبعا بيبقى له تمن في الآخر. بتاخدي رأي مين في اختيار أعمالك؟ بقعد أتكلم كتير مع الناس المقربين ليا، جوزي، ووالدي ووالدتي، وأصدقائي المقربين، بس في الآخر القرار النهائي بيبقى ليا، بعد ما بفكر في وجهات نظرهم. كواليس المسلسل كانت عاملة إزاي؟ كانت جميلة بالمخرج الجميل "خيري بشارة"؛ لأنه بيتمتع بالهدوء، وبيحب الممثل، وطبعا كان فيه التوتر العادي عشان نلحق رمضان، بشكل عام كانت من أحلى الكواليس اللي اشتغلت فيها. مين كنتي بتحلمي تمثلي قدامه؟ كان نفسي أمثل مع الناس الكبار عشان اتعلم منهم، زي عادل إمام، والحمد لله ده اتحقق، وكان نفسي قوي أمثل مع أحمد زكي الله يرحمه. فيه شخصية حابة تجسديها؟ آه، بس مش هقول لأن الأفكار بتتسرق. إيه رأيك في صناعة السينما في مصر؟ رأيي إن فيه محسوبيات كتير، وفيه ناس بيشتغلوا مش عشان همَّ الأجدر بالدور، لكن عشان فيه أصحاب بيشغلوا بعض، وقليلين اللي بيشتغلوا بحرفية، لكن مع ذلك حاسة إن السينما ماشية في طريق أفضل من الأول، وفيه اهتمام أكبر بسينما المرأة، وبقى فيه اهتمام بأفلام تانية غير الكوميدي. والدراما التليفزيونية؟ أنا شايفة إن المستقبل الجاي للدراما، لأن السينما لو ماحصلش فيها وقفة.. هتندثر! إيه اللي ممكن يخليكي تعتزلي الفن؟ لو مابقاش فيه قيمة، أو ما ألاقيش مكان لنفسي فيه. كلمينا عن طفولتك شوية كنت طفلة سُهنّة، أبان هادية، بس بعمل بلاوي من تحت لتحت، وكنت بلعب كل ألعاب الولاد، لأن إخواتي الأصغر مني الفرق بيني وبينهم قليل، وكنت بلاقي نفسي معاهم لأن أختي كانت معظم الوقت بتقرأ روايات، وأنا كنت بتخنق، فكنت بلعب معاهم. قسمت فيها إيه من صفات مامتها؟ هي دمها خفيف جدا، وأتمنى تكون واخدة ده مني طبعا، بس هي عِنَدِيَّة زيي، وبتحب الضحك وملهاش في النكد، وعصبية زيي برضه، بس بتفك بسرعة، وأنا كمان من النوع اللي لما بيزعل بيصفى بسرعة. بتحلمي ليها بإيه؟ بحلم ليها بأحلى وأحسن حاجة في الدنيا، وتعمل اللي هي نفسها فيه، وحاجات كتير قوي قوي. لو قسمت اتقدّم لها عريس ظروفه المادية متوسطة بس راجل كويس توافقي؟ أنا لسه بفكر في الحضانة دخلتيني على العريس لكن شوفي، إنتي قلتي كلمة السر.. هو "راجل".. وهو ده اللي مطلوب، ممكن يكون معاها فلوس قد كده ومش سعيدة معاه، مش مهم الطلبات المادية على قد امكانياته. لو رجع الزمن تغيّري إيه في حياتك؟ متهيأ لي مش هغيّر أي حاجة. لو بإيدك تلغي صفة بشرية من العالم.. تلغي إيه؟ مش هينفع نلغي صفة وحشة، بس ممكن نقللها، لأن مفيش بني آدم كله خير بس. بتحبي تقرأي؟ ماعنديش وقت قوي، وبحب الثقافة المرئية أكتر. إنتي ست بيت شاطرة؟ ست البيت بينطبق عليها حاجات كتير، نظافة ومكواة وترتيب ونظام، لو كده يبقى أنا ست بيت شاطرة، لكن الطبيخ لأ، مابحبش أطبخ كل يوم. بتحبي الكورة؟ آه، بس عشان أغلّس بيها على جوزي، أنا بشجع الزمالك وهو الأهلي. أكتر حاجة بتنرفز داليا إيه؟ الكدب والغباء بيجيبوا لي انهيار عصبي! لما بتضايقي بتعملي إيه عشان تهدي؟ المكواة بتهديني، أو أسوق في مكان مفتوح وأسمع مزيكا. إيه أكتر حاجة بتضايقك في الشارع المصري؟ حد يبقى راكن صف تاني وشادد الفرامل، وأدور عليه فألاقيه جاي بلا مبالاة!! أكتر حاجة بحبيها في المصريين؟ بيضحكوني جدا لما يجاوبوا على أي حاجة مايعرفوهاش، عشان بس يخدموكي، حتى لو معلومة غلط حد رخّم عليكي قبل كده عشان يتصور معاكي؟ لو هو جاي يرخّم.. برخّم عليه أنا كمان، ما أنا بني أدمة في الآخر. إيه الجديد عند داليا؟ بدأت أقرا عدة سيناريوهات، عشان أختار منهم عملي القادم. هتيجي السينما ولا إيه؟ لما السينما الحلوة تيجي الأول، ويجي سيناريو محترم، ويكون العمل ككل أبقى سعيدة إني عملته. خبر حصري لكلمتنا؟ مفيش حاجة حصري غير إن قسمت داخلة الحضانة كلمة أخيرة لكلمتنا طول عمري بشوفكم مختلفين، ومتجددين، وبتمثلوا الشباب بجد، وأنا مقصرة معاكم، بس بحبكم قوي.
