عشر تصريحات من عمرو أديب ويصرخ الزمالك رايح فى داهية بسبب مرتضى منصور

عمرو أديب يصرخ على الهوا ياتلحقو الزمالك او ماتلحقهوش
سارة عبد الباقي
فتح الإعلامي عمرو أديب النار على المسؤولين، بسبب استمرار مرتضى منصور بنادي الزمالك رغم حكم عزله من رئاسة النادي. وتحدث عمرو أديب بانفعال شديد في أكثر من ملف على رأسها ملف خسارة القمة وصفقة إمام عاشور للأهلي وانهيار الزمالك طوال الفترة الماضية، محذراً من سيناريو الموسم المقبل ما لم تتحرك الدولة لإصلاح ما تم إفساده في النادي. ونستعرض التصريحات التفصيلية لعمرو أديب في برنامجه الحكاية على قناة أم بي سي مصر، حيث قال:عمرو اديب : أنا بقولكم والأيام بينا، نادي الزمالك بينتهي، يا تلحقوه يا متلحقهوش.
وأضاف أديب كل المطلوب دلوقتي الزمالك يبقى زي أي فريق في الدوري من ال 17 فرقة، مقولتش حتى يبقى زي الوصيف ولا البعبع، أنا بقول لحضراتكم إحنا رايحين في سكة اللي يروح ميرجعش .

وأضاف عمرو أديب ، الناحية التانية الأهلي عنده كل حاجة، دكة برة فرقة كاملة، فيه نادي، فيه قيادة، فيه استقرار، فيه فلوس، فيه مرتبات، فيه إعلانات، فيه دعم..
وأكد إحنا عندنا إيه من ده؟ إحنا عندنا واحد بيفكر في السحر، إحنا أتغلبنا عشان مروحناش الماتش أصلاً، محدش يكلمني فني، مفيش فرقة بتلعب بخطة في مصر إنتوا بتضحكوا على مين؟ .
وقال بنبرة حزن - مستنيين إيه من فرقة تلتها بيفكر هيهرب من الزمالك ويروح الأهلي إزاي، والتلت التاني بيفكر هيروح فيوتشر وبيراميدز إزاي، والتلت الأخير بيقول هقعد أنا لوحدي ليه، اللعيبة كل اللي عايزاه تلعب في نادي طبيعي، متتشتمش ولا تتهزق، ولا يتقالها أنت جيت الزمالك بشبشب، الخطيب مطلعش مرة قال لحسين الشحات أنت كنت جايلي بشبشب أو بتشرب مخدرات، ومش هقول على التالتة .
واكد أديب - متفاجئتش بخسارة إمبارح، من أسبوعين أتكلمت عن محمد صبحي اللي بيدخل فيه أجوان كباري، وإمبارح أي كورة داخلة فيه عادي، دي نفسية الفرقة اللي نازلة تلعب باسم الزمالك لقاء القمة؟ .

وقال : وبعدين إيه الفانلة الزرقا اللي كلها ترتر ونجف دي، دي مش فانلة رجالة فين فانلة الزمالك الأبيض بخطين، الوهم موصلهم أن لو لبسنا الفانلة الزرقا هننزل نخلي الدنيا زرقا، وأهي أزرقت على دماغ أهلنا إمبارح .

وأضاف - الماتش لما خلص فيه دكر في النادي فتح بوقة، ولا الهوا، أتغلبنا وخلاص، محدش يقولي إمبارح مكنش فيه خطة، إمبارح مكنش فيه فرقة أصلاً، اللعيبة مبتاخدش مستحقات، لكن بتتنقل من فرقة للتانية عشان السمسرة والعمولة .

وأضاف عمرو أديب - أوسوريو بيتكلم مع محمد عبدالمنعم على الكورة اللي عملها، أومال لو كنت شوفت الباشا اللي بيقف على الكورة كنت عملت إيه وأكد لاعب زي زيزو أنا لو منه هقعد أفكر أنا قاعد ليه، أنا قاعد عشان مين، أنا عايز ألعب في فرقة مقامي، زيزو ده لاعب دهب، حرام اللي هو فيه دلوقتي، هي دي الفرقة اللي هتلاعب كريستيانو رونالدو في البطولة العربية؟
وقال محمد صبحي بيطلم إمبارح من اللي شايفه، الشناوي إمبارح بيكلموه في التليفون تعالى فيه هجمة .

وأكد عمروأديب - الزمالك كان واخد دوري وكأس بلجنة، لكن النهاردة إحنا هنافس على نص الدوري، أو الربع الأخير من الجدول، إحنا رايحين في سكة اللي يروح ميرجعش -
إمبارح جمهور الزمالك نطق، أبتدت الناس تستقيل، خلاص بقى مستنيين إيه تاني، لا دولة عايزة تتحرك، ولا جمعية عمومية عايزة تتحرك، ولا لعيبة مستعدة تعمل أي حاجة .

وانفعل على الهواء- بيضايفني ويؤسفني إن نادي زي الزمالك يحصل فيه كدة، زي ما كنا بنترحم على الإسماعيلي السنة دي، لو الأمور استمرت بنفس الشكل يبقى هنقول كدة على الزمالك السنة الجاية، مش هيحس بالوجع اللي إحنا فيه دلوقتي غير اللي بيحب الزمالك بجد - إنتوا فاكرين أن المدرب هيجيب اللعيبة ويقولهم إنتوا غلطتوا في كذا وكذا؟ مش هيحصل لأن الموضوع أكبر من كدة .
مشيرا الى ان الزمالك بقى خناقة، كل لاعب بيفكر أنا هيجي عليا الدور أمتى، خبطة إمام عاشور معلمة في النادي كله - أنا حاسس إننا متسابين في السقوط الحر، ولأسباب معلومة وغير معلومة، الناس سيباه، الصحافة برة بدأت تتكلم أن أوسوريو مش مبسوط، وارد نصحى نلاقيه مشي زي اللي قبله واللي قبله، أنا بقى كلاعب إيه اللي هيخليني أكمل في نادي بيحصل فيه كدة؟ -
هل فيه مشجع للزمالك مستني حاجة من النادي دلوقتي؟ بيصدروا للناس أن فيه مؤامرة على النادي، طيب خلينا بقى في المؤامرة لحد ما النادي يموت. وأكد عمرو أديب ، من يناير قولتلكم الدنمارك كوبري إمام عاشور للأهلي، الأهلي اللي نسي الشتايم .
وقال جايز مكنش يقصد، دعه يعمل دعه يمر، كأن الأهلي ناقصه إمام عاشور، وبكرة وبعده هتشوفوا تاني وتالت ورابع .

أقرأ المزيد من الأخبار المتعلقة بالزمالك

مرتضى منصور يتهم رجب بحة بإسقاط الزمالك فى القمة امام الأهلي ويشطب هذا الثنائى