فيديو | حسين الشحات: كنت بنام من غير أكل عشان مكنش معايا فلوس

سرد اللاعب حسين الشحات لاعب النادي الأهلي ذكرياته قبل انضمامه للعبة كرة القدم، قائلا: "أوقات كتير كنت بنام من غير أكل ومكنش بيبقى معايا فلوس"
وأضاف الشحات خلال لقائه مع مهيب عبدالهادي في برنامج "اللعيب" المذاع عبر فضائية "mbc مصر" أن حب الناس كان بمثابة التعويض له عن أشياء كثيرة وكذلك دعاء والدته وزوجته وأبنائه وأخواته وأصدقائه
ووجه اللاعب حسين الشحات لاعب النادي الأهلي رسالة لوالدته باكيًا، قال فيها: "شكرًا على اللي انتي عملتيه معايا ومش عارف أقولك إيه ولو قعدت خدام طول عمري تحت رجليكي وأتمني إنك تفضلي راضية عني وتدعيلي".
وتابع الشحات: "افتكر إنك اشتغلتي وتعبتي كتير عشان تجيبي لي الحاجات اللي بحبها وجزمة الكورة اللي كنت بجيبها من 78 جنيها وكنتي بتعملي حاجات كتير عشان تجيبهالي وبشكرك جدًا وبشكرك إنك استحملتيني".
كما وجه الشحات رسالة شكر لزوجته قائلًا: "زوجتي اللي باعت الدهب بتاعها بعد فترة من الجواز عشان كنت بلعب بفلوس قليلة وباعت الدهب من ورايا، وقالت لي خد خليه معاك أنا وأنت واحد وكده كده هتجيب لي أحسن منه".
ونجح النادي الأهلي في التعاقد مع اللاعب صاحب ال 26 عامًا، والقادم من صفوف فريق العين الإماراتي خلال فترة الانتقالات الشتوية الجارية، لتصبح تلك الصفقة بذلك الأغلى على الإطلاق في تاريخ النادي المصري الكبير.
قال الشحات، إنه عمل أثناء دراسته "شيال ألوميتال" مقابل 400 جنيه شهريًا، وعاملا في بنزينة، مضيفا أنه عمل أيضًا بإحدى مدارس الكرة متابعا: "كنت بلم كور، وكنت أتقاضى 10 جنيهات في اليوم.
وأضاف:" أنا فخور بذلك، كما أنا فخور بعملي في البنزينة، وأحب هذا العمل، وكنت بطبق باليومين في عملي".