الغلاء وتحية لهذه السيدة

إنها مصر

قرأت هذه الحكاية على فيس بوك، واستأذن صاحبتها أن أنقلها كما هى، والتعليق آخر المقال:
تقول: امبارح كنت فى كارفور ألماظة وملقتش على الرف غير كام إزازة زيت ميتعدوش على الصوابع، المهم مكنتش عايزة زيت أصلا بس الرفوف الفاضية لفتت نظرى، لقيت شيبسى أنا بحبه جبت منه 20 كيس، ورحت على الكاشير.
لقيت شاب معاه عربية فيها ميقلش عن 100 إزازة زيت ويمكن اكتر، وحظه المنيل انى رحت على الكاشير إللى هو واقف عليه طبعا أنا شفت المنظر وجوزى فهم على طول إللى حاعمله.
معرفتش بصراحة اهدى وقلت للكاشير يعنى مفيش ولا إزازة زيت جوه وحضرتك بتحاسبله هو لوحده على عربية مليانة لآخرها زيت على أساس إيه، الكاشير سكت وقعد يبصله ويبصلى، قلتله فين مديرك مين المسئول هنا.
الشاب قالى انا حاخدهم بالذوق بالعافية حاخدهم، ولو مخدتهمش حبعت ناس غيرى تاخدهم، قلتله تمام روح ابعت ناس تاخد على بال ما تبعت ناس بييجوا لحد إلماظة ويقفوا على الكاشير يبقى فى ناس غيرك اشترت، وقلتله صحبتى فى ألمانيا متقدرش تشترى غير إزازتين زيت بس انت بقى مين عشان تاخد كل ده هو احنا حنبقى أحسن من ألمانيا.
المهم المسئول جه وقاله العربية دى مش حتطلع، ووقف زعق للكاشير قاله كل واحد له أربع أزايز بس، ونادى واحد واخد العربية ودخلها جوه، والشاب فضل يبصلى نظرات غل وقلتله انت عندك سوبر ماركت أو واخدهم تخزنهم عشان تبيع بسعر أعلى، دى مش مشكلتنا انتم من ضمن أسباب المشاكل بالتوازى مع أزمة الدولار.
المهم انى ارتحت وموقفتش سلبية زى كل الناس، جوزى بيقولى ما انتى بتعملى زيه واخدة 20 كيس شيبسى، قلتله لا دى مش سلعة أساسية ده مش زيت ولا سكر ولا دقيق ولا رز نوع الشيبسى إللى انا اشتريته لو اختفى من السوق مش حيعمل أزمة، لكن الزيت حيعمل كارثة لو اختفى وكفاية انه سعره غلى، أنا اكتر حاجة فرحتنى أنه الراجل ده مخدش الزيت لأنه كان بيتكلم انى حاخدهم غصب عنكم كلكم.
●●●
تحية لهذه السيدة عزة الحسينى وصفحة كتيبة 16 إعلام، نحن بحاجة إلى مثلها فى كل مكان، حتى يساعدنا الله فى تجاوز الأزمة، التى يزيدها البعض تعقيدا، "إن الله لا يغير ما بقوم حتى يغيروا ما بأنفسهم"، وكثيرون يصادفهم مثل هذا الموقف ولا يحركون ساكنا، مما يسهم فى استشراء الاستغلال والغلاء وارتفاع الأسعار.
صحيح أنها قصة استغلال صغيرة ولا تقاس بالحيتان الكبيرة التى تمتص قوت الناس، ولكن فلنساعد أنفسنا وبلدنا بما نستطيع أن نفعله، حتى يساعدنا المولى عز وجل.