أم كلثوم تعلن رأيها فى مطربين عصرها: شادية صوت أصيل ووردة «معندهاش فرامل»

في جلسة خاصة جمعت بين الكاتب الراحل الكبير أنيس منصور وأم كلثوم كشفت فيها عن رأيها فى عدد من المطربين والمطربات، ووثق الكاتب الكبير هذه الجلسة بعد رحيل أم كلثوم فيما بدا أنه كان وصيتها بالفعل.
فيقول أنيس لأم كلثوم: ممكن اسألك عن بعض المطربين الموجودين الآن علي ساحة الغناء وتقولي رأيك بصراحة
أم كلثوم: بس متنشرش الكلام ده إلا بعد ما أموت وأنا هقولك عشان انت بلدياتي
أنيس: ربنا يبارك في عمرك ياست.. هقولك الاسم وتقوليلي المعني
أم كلثوم: تمام
أنيس: شادية
أم كلثوم: شادية دي صوت مصري مالوش مثيل بنت مصرية بنت بلد كده ولازم لما تسمعها تحبها
أنيس: صباح
أم كلثوم: صباح صوت مميز بس بيضيع نفسه ولازم تجتهد لأنها نجحت ولو نزلت من نظر الناس صعب ترجع تاني
أنيس: وردة
أم كلثوم: وردة دي ربنا اداها صحة في الجسم والصوت بس تحس إنها معندهاش فرامل يعني لو اندمجت أوي تردح
أنيس: نجاة الصغيرة
أم كلثوم : نجاة كانت تعجبني زمان لما كانت بتختار ألحان تليق على صوتها إنما دلوقتي هي بتقبل ألحان عالية على إمكانيتها الصوتية وهي مينفعش تعلي صوتها اصلا
أنيس: عبد الحليم حافظ
أم كلثوم: ده شخص مجتهد وذكي
أنيس: عبد الوهاب
أم كلثوم: ده بقي بيواكب العصر جداً وألحانه مميزة
أنيس: بليغ حمدي
أم كلثوم: الواد ده شيطان موسيقى وبيجيب جمل موسيقية محدش يقدر يوصلها
أنيس: فريد الأطرش
أم كلثوم: مش عارفة ليه هو مصمم يقحم الموال اللبناني في قلب الغنوة المصرية وده بيقلب الغنوة من فوق لتحت لكن في المجمل ألحانه كويسة
أنيس: رياض السنباطي
أم كلثوم: ده مش بيلحن كلمات الاغنية ده بيلحن معانيها وده مش موجود في كل الموجودين
أنيس: شريفه فاضل
أم كلثوم: صوتها حلو
أنيس: فيروز
أم كلثوم: فيروز صوت مميز وإحساسها الصوتي ممتاز لكن تناغم جسمها مع الغنوة صفر تحس إنها تمثال جميل واقف بيغني
أنيس: فايزه احمد
أم كلثوم: أعظم صوت نسائي ينفع تفصل عليه أي لحن وهتغنيه ببراعة
أنيس: مين أكتر مطرب عاجبك أو أحسن صوت رجالي؟
أم كلثوم: محمد قنديل