عادل السنهوري يكتب: «هي ليه مصر أم الدنيا»

الحكاية مش شعار وعواطف وحب وعشق وانحياز للوطن .. لكنه تاريخ حقيقي لهذا البلد الاستثنائي الذي جاء ثم جاء من بعده التاريخ
طيب هي ليه كانت..ومازالت ..أم الدنيا وأد الدنيا .. تعالوا نشوف
حاجه عجيبه فعلا ، كانت مصر تقريبا أكثر بلدان العالم استقبالا للمهاجرين من كل مكان وبمعنى أدق الهاربين من الجحيم في بلادهم، فعلى سبيل المثال لا الحصر، لما اجتاحت المجاعات بلاد المغرب العربي هرب الآلاف من أهلها خوفا من الجوع وملقيوش حد يستقبلهم غير مصر، فكانوا بيدخلوها قبائل كاملة بالآلاف والكلام دا كان من حوالي 400 سنة.
ولما الإسبان طردوا المسلمين من الأندلس أخدوا بعضهم وراحوا على مصر واستقر معظمهم في كفر الشيخ لدرجة إن فيه قرى كتير في المحافظة دي بأسماء أندلسية، ومع مرور الزمن كان المغاربة كل يوم يجيبوا قرايبهم يعيشوا في مصر ، من الطريف إن بعدما أصبحت الأحوال افضل في بلاد المغرب والجزائر ما رجعوش بلادهم بل العكس فضلت مصر تستقبل أعداد متزايدة فالمغاربة كانوا بيروحوا للحج في مكة ولما يرجعوا تستهويهم العيشة في مصر.
من حوالي 150 سنة لما قامت حرب أهلية كبيرة في لبنان بين الدروز والموارنة لدرجة إن كان بيموت يوميا أكتر من ألف شخص ملقوش برضوا قدامهم غير مصر وهاجروا بالآلاف ومعظمهم استقر في المنصورة وخرج منهم رئيس لبنان المعروف باسم أمين الجميل، والعجيب إن الدروز كمان لما هربوا جم إلى مصر، وكان ممن هربوا لمصر الفنان الكبير فريد الأطرش، وهكذا استقبلت مصر كل المتحاربين في لبنان.!
في بداية القرن العشرين حصلت مذابح الأرمن الشهيرة فهرب الأرمن من جحيم الأتراك وملقوش قدامهم غير مصر يهربوا إليها !! ما عندك أوروبا قريبه منكم ؟ قالوا لأ إحنا مرتاحين في مصر وخرج منهم الفنانة نيللي ولبلبة وفيرزو وأنوشكا ولايزال الأرمن عايشين معانا مصريين أصليين.. أما الطبقة المثقفة في سوريا فكان الأتراك بيضيقوا الخناق عليهم برضوا ملقيوش قدامهم غير مصر ودخلت الصحافة والمسرح على أيديهم لمصر.. اليونانيون كانت الحرب الأهلية تمزقهم فهربوا بالآلاف إلى مصر وكونوا جالية ضخمة عاشت عمر طويل في مصر وتشهد عليهم مدارسهم ومبانيهم.
حتى الإيطاليين أثناء الحرب العالمية الأولى والثانية هربوا من جحيم الحرب إلى مصر وملقيوش أاجمل من مصر يعيشوا بها وأكبر تجمعاتهم كانت في إسكندرية والمنصورة، ويمكن أشهرهم الفنانة الإيطالية داليدا بنت شبرا المولودة في مصر.. حتى آخر ملوك إيطاليا اختار مصر يموت فيها
.. ..آخر ملوك إيران الشاه محمد رضا بهلوي محدش استقبله غير مصر ومات فيها، حتى الملك سعود ملك السعودية اللى كان بينه وبين عبد الناصر عداوة ..لما خلعه إخوته من حكم السعودية يروح فين؟ ملقاش غير مصر تستقبله على أرضها ، أما أعظم ثائر كونغولي وهو بياتريس لومومبا لما بلجيكا قتلته بوحشية هربوا أطفاله لمصر.. حتي كينيث كينياتا الثائر الكيني جاء لمصر وعاش أبناءه فيها وحصل وحصلوا على الجنسية المصرية في الستينات.
أما أرق من هرب من الجحيم إلى مصر فكانت السيدة زينب حفيدة رسول الله صلى الله عليه وسلم وأهل البيت الشريف التي لم تجد افضل من مصر لتستقبلها ولازلنا نحتفل بقدومها إلى مصر كل عام في مولدها الشهير.
وقبلها بسنين طويلة استقبلت مصر أسرة صغيرة معاهم طفل صغير كانوا هربانين من بطش الرومان اللى كانوا بيقتلوا أطفالهم .. فقالوا مفيش بلد هتحمينا غير مصر.. الطفل الصغير دا كان سيدنا المسيح وامه العذراء مريم..خير نساء العالمين ... يا الله..استقروا في مصر 3 سنوات ونصف تقريبا. ولحد النهارده خط سير رحلة السيد المسيح معروفة بدقة والشجرة اللى احتموا تحتها موجودة.
قبل سيدنا المسيح بسنين طويلة هربت عيلة سيدنا يوسف من جحيم المجاعة راحوا فين ؟ ملقيوش غير أخوهم يستقبلهم في مصر ويعيشوا على أرضها مئات السنين ويكونوا فيها القبائل الإسرائيلية الرئيسية التي تحولت لألد أعداء مصر بعد كدا، أما الهجرة السودانية والنوبية إلى مصر فلم تنتهي أبدا واللي قال مصر والسودان شعب واحد مكدبش بيننا وبينهم رباط ليوم الدين.
أمرك غريب يا مصر؟!
كل العالم كان يعاني إما من الحروب أو المجاعات ما كانش عنده غير مصر يهرب إليها في حين إن مصر شافت أهوال طول تاريخها... مجاعات واحتلال ورغم كدا مفيش أية هجرة جماعية خرجت من مصر، فرغم أن في أحد الأزمنة كان الناس في مصر بيموتوا من الجوع لدرجة نبش القبور، مفكروش ييسيبوا مصر.. مصر كانت طول تاريخها دولة بتجذب السكان ، وحتى النهارده رغم صعوبة الحياة ورغم إن الكل بيقولك عاوز اهاجر ولكن اللى بيهاجر فعلا مبيقدرش يمنع نفسه عن مصر وبيفضل مرتبط بها لآخر لحظة في عمره.
تخيل حتى في الظروف اللي بتغيرها مصر دلوقتي بتحتضن 12 مليون شقيق عربي من اليمن وليبيا والعراق وسوريا والسودان واريتريا والصومال
عارف يعني إيه بلد يهرب ليها الناس من الجزائر والمغرب وليبيا وتونس والسودان والنوبة والعراق وسوريا ولبنان وفلسطين والجزيرة العربية واليونان وقبرص وأرمينيا وخوارزم وأوزبكستان وإيطاليا، ماهي البلاد دي كانت زمان هي كل الدنيا.
عرفتوا ليه هي أم الدنيا وست الدنيا رغم حقد الحاقدين والكارهين