أماني ضرغام: «اتعرفت علي ياسر رزق بخناقة»

قالت الصحفية أماني ضرغام زوجة الكاتب الصحفي الراحل ياسر رزق« ان إحنا بنشتغل في الميديا طول عمرنا.. لكن بيتنا وحياتنا كانت بعيدة عن الإعلام، و اتعرفت على ياسر بخناقة.. لما اتنقلت لمؤسسة أخبار اليوم.. وفوجئت وأنا نازلة أعمل شغل إنه مفيش عربية غير العربية اللى هتنزل ياسر رزق يروح شغله.. ولما قولتلهم أنا اهم قالولى أمشي جنب الحيط ده ياسر رزق، بس هو جه لحد عندي وقالي هوصلك».
وأضافت ضرغام خلال حوارها لبرنامج «عيلتي وافتخر» المذاع علي «شعبي اف ام»، مرة شوفته وكان بيغني لعبد الحليم حافظ فبرضه لقيت نفسي بهاجمه وقولت له إنت فاكر نفسك عبد الحليم وماشي تغني كده، دلوقتي لما بفكر في الجراءة اللى كنت فيها بقول ربنا بيسبب الأسباب.
وتابعت« كان ليا نصيب أكبر في تسمية أولادي.. ومنهم ابنى أحمد سميته على اسم بابا.. واللى ليه تأثير كبير جدا في حياتي وثقافتي».
أما عن كواليس مسلسلها يوميات زوجة مفروسة فقالت «كنت بكتبه وما كنتش متأثرة باللي بيحصل في بيتنا.. لأن شخصية "انجى" مش شبهي ولا شخصية "علي" شبه ياسر خالص».
وعن ولادها فقالت:« الولاد كانوا بيخافوا من ياسر أكتر بس في نفس الوقت كان هو الأحن، وخوفهم منه كان خوف من زعله لأنه كان بيحسسهم إنه زعله ده اشد عقاب، و عمر ابنى كان نفسه يشتغل في الصحافة.. لكن ياسر كان يخشى على أولاده من مهنة الصحافة، وهو حاليا بيشتغل محلل سياسي واقتصادى في شغله، و السبب في إني اشتغل صحفية هو بابا.. بابا كان من عشاق الأدب والثقافة والصحافة.. وكان بيديني كتب أقرأها كأنها واجب في الإجازة الدراسية، أما ياسر رزق كان نفسه يشتغل دكتور وهو صغير..»
واختتمت قائلة «بقول لياسر انت مش هتغيب عننا ولا لحظة واسمك باقي في أولادك وشغلك وعملك الصالح الى أبد الدهر».
أقرأ ايضاً - روجينا.. تواجه المجتمع ب«انحراف» في رمضان.. وتخرج عن المألوف