وصلة «هزار» بين تامر عبد الحميد ووالده بسبب الأهلي والزمالك

دخل أحمد عبد الحميد والد تامر عبد الحميد نجم الزمالك ومنتخب مصر الأسبق، في وصلة ساخرة مع نجله عن تشجيع الأهلي والزمالك مؤكداً أنه يشجع الاهلى بقوة ويرى انه يتعرض للظلم.
وقال أحمد عبد المحيد الذى حل ضيفاً على برنامج النجوم فى رمضان مع الاذاعية نجلاء حلمى والناقد الرياضى محمد عراقى عبر أثير إذاعة الشباب والرياضة:" تامر طالع يقول أنى بطرده من البيت عشان الأهلى، طب ما ليا حق، وبقوله في المشمش الزمالك يكسب الاهلى، لعبناهم واحنا ناقصين فريق بالكامل ومعرفوش يكسبوا، شوف يابنى ركلات الجزاء اللى بتتحسب على الاهلى وبتتحسب لصالح الزمالك".
ورد تامر عبد الحميد على والده قائلا :" ياحاج خليك في فرقتك وشجعها بس مالكش دعوة بالزمالك ، أنا خايف عليك عشان كورونا ومش باجى أزورك انما بعد كلامك دلوقتى هجيلك وأفطر معاك".
ورد أحمد عبد الحميد :" كل شوية تقولى قطبى الكرة المصرية ، طب ازاى يابنى كلمة قطبى دى يعنى في تساوى في القوة أنا واخد 42 دوري وانت 12 يبقى ازاى بقى في تساوى ، الزمالك فرقة كويسة بعد رقم 2 بعد الاهلى في كل حاجة".
وقال تامر عبد الحميد: "ياحاج هقول للناس انك كنت بتيجى تشجع الاهلى في مدرجات الدرجة الثالثة وانا بلعب في الزمالك وعمرك ماكنت بتفكر تشجعنى".
ورد الحاج أحمد عبد المجيد :" عمرى ما أشجع حد غير الاهلى ، انت نسيت أفشة ولا ايه".