سارة الذهبى والله والله والله كل شيء بأمر الله وفى أوانه بس الواحد ساعات بينسى.. سارة.. أتمنى توصّلى رسالتى دى يمكن تفرق فى حياة حد.. أنا اللى اتأخرت فى الحمل 11 سنة... انا اللى استحملت كلام سخيف ونظرات أسخف من ناس للأسف وجودها فى حياتى مجبوره عليه، يعنى مينفعش أقطع معاهم!! انا اللى صحباتى مبقوش يخرجوا معايا عشان الخروجة فسحة للأطفال وانا من غير أطفال فاتركنت على الرف ووقعت من حساباتهم كلهم؛ واحدة ورا التانية!! وانا برضه اللى كان مبيتقليش من أعز صحباتى انهم حامل عشان بيخافوا على حملهم منى!! فى الأول افتكرتهم مش بيقولولى عشان بيخافوا على مشاعرى لحد ما واحدة قالتهالى فى نص الكلام من غير تزويق انهم بيخافوا لأحسدهم واستكتر عليهم النعمة! وانا اللى بيخبوا منى ولادهم على أساس ان عينى وحشة وهحسد أى طفل لإنى مبخلفش!! اللى تقولى كل مرة أصل ابنى نايم، أصل بنتى عيانة، أصل ولادى التلاتة فى المستشفى! كلام بيتكرر كل مرة بسيناريو مختلف! وانا اللى فجأة لقيت نفسى لوحدى فى كل حاجة بتهمة انى معنديش أطفال، كإن ده ذنب بيدفّعونى تمنه!!! انا اللى كبرت وعجّزت مع انى لسه شباب من كُتر الإحساس باليأس ومن كُتر ما بسمع كلام بيسم البدن! انا اللى جربت كل الوصفات والأعشاب اللى على الانترنت من كف مريم لعشبة المدينة ويا قلبى لا تحزن... انا اللى عملت الحجامة 3 شهور ورا بعض زى ما اتقالى بالظبط!! انا اللى اتشكشكت بحقن منشطة بالكوم لعل وعسى أحمل... انا اللى كنت بسمع وبمشى وراء فَتْى جروبات الانترنت وأدوية الدكاترة ونصايح الستات العواجيز ووصفاتهم اللى معرفش بيجبوها منين بس مشيت وراهم! انا اللى عملت تلقيح صناعى بدون جدوى... انا اللى عملت حقن مجهرى مرتين مرة منهم طلع الحمل خارج الرحم وسط ذهول الدكاترة!! انا اللى اتمرمطت بين دكاترة كتير وأسامى كبيرة ودفعت مصاريف مهولة واتعمل عليا أحلى شغل وسافرت كتير من بلدى عشان أتعالج على أمل أن حد يُصدُق معايا وأشيل عيل على كتفي! انا اللى سمعت بودنى أن استحاله هحمل لوحدى ولو حصل هيكون خارج الرحم برضه!! انا اللى اتقالى انتى حالة نادرة جداً عشان يحصل معاكى كل ده!! انا اللى فكرت مرة فى الانتحار!! انا اللى سمعت بودنى كلام ونأرزة من سلايفى واخوات جوزى وأمه بمناسبة ومن غير مناسبة واستحملت انهم مسمينى المعيوبة عشان احنا فى أرياف.. استحملت حماتى اللى عمالة تجيب لجوزى عروسة ورا التانية وبتخرب علينا عيشتنا ومش بتنادينى الا بالأرض البور لو فى يوم اعترضت على عمايلها وقولتلها تسيبنا فى حالنا!! انا اللى كنت حاسة انى منسية!! انا اللى حسيت انى شخص بيتخاف منه رغم ان ملوش أى ذنب.. حسيت انى ناقصه مع ان دى حكمة ربنا... لدرجة انى صدقتهم انى معيوبة بجد! اضطريت استحمل أوضاع زى الزفت واتهانت كتير؛ ما انا لازم استحمل وكفاية عليا أوى انى متطلقتش لحد دلوقتى على رأى اخوات جوزى! وسبحان الله بعد ما تعبت من اللف ودوخت من كتر الجرى ورا الدكاترة وقررت أرضى باللى مكتوبلى عشان معادش فى ايدى أى حاجة تانى اعملها ربنا كرمنى من وسع... وحملت من غير حبة دوا واحدة وحملى كان متيسر طول الشهور بفضل الله وخلفت أحلى توأم فى الدنيا... والله والله والله كل شيء بأمر الله وفى أوانه بس الواحد ساعات بينسي.. ساعات ببستعجل.. ساعات الشيطان بيستغل نقط ضعفنا ويخلينا نقنط من رحمة ربنا والعياذ بالله وينغّص علينا عيشتنا! نفسى أقابل كل بنت متأخرة فى الحمل واحضنها جامد أوى وأقولها متخافيش ربنا هيراضيكي... متزعليش من نظرتهم ومن كلامهم اللى من تحت لتحت عليكى!!! هما اللى غلط وانتى زى الفل.... اوعى تصدقى ان ده ذنبك... ده رزق ربنا بيكتبه لمن يشاء فى الميعاد اللى بيريده وممكن يرزقك برزق تانى غير الخِلفة ويراضيكي.. نفسى اقول لكل واحدة ربنا رزقها قبل التانية ان دى مش شطارة منك، ولا انتِ أزيد من اللى لسه مخلفتش بحاجة.. ده رزق مقدر ومكتوب.. فى ايد ربنا سبحانه وتعالى وبس.. حرام تجرحوا مشاعر واحدة كل ذنبها ان نصيبها لسه مجاش أو نصيبها فى رزق تانى غير الخلفة... بلاش تضغطوا عليها وتنبذوها وتبصولها بنقص... ربنا عوضنى عن كل حاجة وعوضنى بأحلى حاجة.... ربنا كبير فوق ما تتخيلوا ورحيم فوق ما تتصوروا.... بس انتوا اعبدوه بيقين وادعوه بيقين.... وارحموا من فى الأرض يرحمكم من فى السماء... انتو متعرفوش الكلام ده بيأثر على نفسية أى ست ازاى مهما كانت مبينة انها قوية. وممكن تكون نفسيتها الوحشة دى هى العائق الوحيد للخلفة.. عائق نفسى بس... بلاش تقسُوا قلب الراجل على مراته.. بلاش تخربوا عليهم وتجبوله فى عرايس! سيبوا كل واحد فى حاله... الخلفة رزق... مش شطارة... ربنا يرزق كل مشتاق بالذرية الصالحة المعافاة.... استغفروا كتير... تصدقوا كتير... ادعوا بيقين وتوكلوا على الله... ودى خلاصة تجربتى.. لا تعبدوه ليعطى بل اعبدوه ليرضى... فإذا رضى أدهشكم بعطائه. القفلة كتير أوى بتعدّى وتفوّت حاجات تضايقك من شخص مرة واتنين وعشرة بس ممكن على أبسط موقف بينكم بعد كده تحصلك قفلة!! كتير أوى تفهّم شخص عزيز عليك بالمحسوس كده ان فى حاجة بيعملها بتزعلك ومن كتر ما بتقولهاله وهو مش بيستجيب فييجى يعمل نفس الحاجة فى مرة فيلاقيك جبت آخرك واتقفلت منه ومن تصرفاته.. حد اشتريت خاطره مرة واتنين ومية ولقيت نفسك ولا فى باله أصلاً وبيتعمد يتجاهل مشاعرك ولو زعلت بيسيبك تخبط دماغك فى الحيط فا مهما حصل بعد كده هتلاقى نفسك وصلت للقفلة!! ساعات من كتر ما انت اللى بتهزر وبتضحك وبتكبر دماغك وبتفرفش اللى حواليك وبتستوعب الكل فبيعتبروا ده حقهم عليك وان مينفعش يجيلك يوم وتزهق أو تتعب أو متكونش قادر تكون مصدر الايجابية لغيرك فتلاقى نفسك لو قابلتك مشكلة لوحدك ومحدش بيهتم يخرجك من حالتك المزاجية الوحشة وبيطنشوك عشان مش ناقصين وجع دماغ فا هتوصل للقفلة!!! وتندم انك جيت على نفسك قبل كده عشان ناس مش قادرة تستحملك فى ظروفك زى ما انت ياما استحملتهم فى ظروفهم وتقبلتهم فى كل حالاتهم! الشخص اللى بيستحمل وبيعدّى كتير لما بيقفل بيبقى واصل لمرحلة وحشة، كون انه وصل لمرحلة ان مبقاش فارق معاه حاجة ولا فارق معاه تصرفاتك مهما عملت فا دى خسارة كبيرة هتحسها بعدين!! متخافش من أى شخص طول ما هو بيعاتب وبيقول اللى فى قلبه ومبيشيلش جواه حاجة لكن خاف من الشخص اللى كان قلبه مفتوح لك علطول وفجأة قرر يكتم ويبعد وميتكلمش ولا يواجه... قرر يمشى ويسيب كل حاجة وراه من سكات! متوصلوش حبايبكم ان قلبهم يتربس من ناحيتكم، انهم يبقوا باردين معاكم!!! يقرروا الهجر لإنهم تعبوا من طلب الوصال!! متوصلوهمش انهم ياخدوا بعضهم ويمشوا بعد ما كانوا قاعدين ومربّعين على بابكم.. انهم يشتروا دماغهم زى ما انتوا بتشتروا دماغكم... لو لاحظت ان حد بتحبه اتغير معاك اسأل نفسك هو اتغير ليه قبل ما تتهمه انه اتغير!! راجع تصرفاتك قبل ما تقرر تبعد عنه.. افتكر هو قد ايه كان جنبك وان مش سهل عليه يبعد الا لو أسبابه قوية.. مش عشان شخص بيحبك واستحملك سنين وسنين يبقى الطبيعى انك تضايقه وتيجى عليه ولو اعترض على طريقتك معاه أو اشتكى منها تركّبه الغلط وتلومه انه ازاى مش قادر ييجى على نفسه زى كل مرة كإنه مش بنى آدم زيه زيك وليه مشاعر... اعملوا حساب لرصيدكم عند غيركم لإنه ممكن جداً يجيله يوم ويخلص.. مفيش رصيد مبيخلصش الا فى علاقة الأب والأم بولادهم، غير كده مفيش رصيد بيزيد لوحده من غير ما نتعب عشان نحافظ عليه.. اعملوا حساب لطاقة اللى قدامكم عشان لكل انسان طاقة مهما كانت كبيرة... وفى مواقف بتستنفد معظم طاقتنا وبتخلى القفلة تيجى قبل الأوان... ما تضمنوش وجود حد أوى خصوصاً لو صارحكم كذا مرة انه مش مرتاح.. مفيش حد مضمون.. مهما كان بيحبك فالحب محتاج حاجات كتير أوى ترويه وتصونه... ما تستهونوش بالقفلة وان حبايبكم يجيبوا آخِرهم عشان القفلة لما بتحصل مفيش علاقة بترجع سوية وصافية من بعدها تانى!
