اوعوا تنسوا

من يومين أعلنت
في بيتي اني بقيت رئيس
ردت زوجتي عليا
قالت يا ريتك تبقى زى ونيس
تبنى العيال من جديد
بالحب تبقى ودود
تزرع قدام عنيهم للآمال ورود
تبقى بطل
تكتب لهم في أول الكراسة
وداعا يا كسل
تبقى للبناء نموذج فريد
من غير كلل
من غير ملل
من غير وجل
ومهما الغير جدف مع التيار
وكان التيار
لاقتصادنا سوس وانهيار
تجدف العكس تبقى عنيد
يبقى قلبك لحب مصر
زى طهارة قلب طفل وليد
يا ريتك تبقى ونيس
تحارب الرشوة حتى لو كانت
في ليل دميس
وتعلم الناس الثقافة
الشوارع تبقى عنوان النضافة
يا ريتك تصحى فيهم حب الوطن
وترسم بالعرق أنشودة
وتعلى الزغروده
فوق تروس المكن
صدقني هتموت كل المحن
يا ريتك تبقى مع الجيران جليس
وتحول كل كلامك إلى فعل نفيس
وتناشد همة الشباب
من غير لوم ولا عتاب
يشمروا عن سواعدهم
يبقوا على الفساد دياب
ويبقى الأمل بالإخلاص عمل
زى ربنا ما وعدنا في كل كتاب
يا ريتك تشرح مفهوم التعمير
بأبسط التعابير
حتى لو قامت القيامة
أو هلت علينا منها علامة
نزرع اللي في ادينا
حتى لو كان فسيل
يا ريت تجدد زراعة الانتماء
لتراب الوطن
هيساعدك القادر رب السماء
فاكر يا حبيبي أيام زمان
ساعتها قلتي إيه؟
حبنا لبعضنا يا سلام عليه
أنا سمعتك بتقولي يا حبيبي
بصراحة قلبي لها كان عطشان
زى عطشنا للأمن للامان
رجعت تاني تكمل الطلبات
قالت يا ريت تقوم على الصحرا
بكل الغزوات
منها يكون أكلنا من غير مسرطنات
نفسي أشوف اوضتين للعيال
أملى ليهم مش محال
ونهدم كل عشوائيات
نبنى عمارات
للسحاب ناطحات
ويبقى خير الجايات اكتر من الرايحات
يا ريت نجنى صبرنا ابتسامات
***
قلتلها لغاية كدا كفاية
العصايا مش معايا
العصايا كانت معجزة موسى
كانت للكليم
معجزة من رب قدير عليم
كان فيها سحر من رب الهداية
ضرب بها البحر انشق الطريق
لأنه كان للإخلاص صديق
أنا كمان هكون لحبكم رفيق
هحقق البرنامج اللي أنا قلته
وانتم معايا
الضمير كرباج مستني بلا تحقيق
تعالوا أفكركم بالبتول أم عيسى
الست مريم النفيسة
الطاهرة الشريفة
كانت قوتها خارت
تحت نخلة رطبها طابت
قالها هزي الجزع
الرطب عليكى
بين ايديكى تتساقط
***
بس علشان مصر اسمعوني
إذا أخطأت للخير رجعوني
وإذا نامت عيوني
بالبرنامج اللي حلمت به معاكم
حاسبوني
بس خلى بالكم
أنا محتاج سواعدكم
والأفكار الحلوة من عقولكم
عرقنا هيكون نقطة البداية
هيكون للتصدير مرايا
هنحقق أملنا خطوة خطوة
هيكون لنا على الصعاب
سطوة وألف سطوة
كمان مش هبص تانى ورايا
مش همد لبره ايدي
مش هحط همومي على الحبيبب
حفيدى
من أرضنا هيكون غداك
وغدايا
وهننسج سوا غطاك وغطايا
ووعودي هتبقى قدام عنيه
صباحى ومسايا
هحققها بيكم
تبقى لنا قمرة
تبقى للوليد شمسايا
وهكتب على باب بلدنا
ادخلوها بسلام
فيها أمنكم فيها الأمان
مصرنا أم الدنيا
ألوان شمسها بقت حاجة تانية
أنشودة اتحققت بدم ولادنا
وهكتب على الميدان
اوعوا تنسوا ثورة قامت
غيرت وجه الزمان
اوعوا تنسوا البداية
اللي كانت أول خطوة في الحكاية
مصر عايشة
قمرها ... شمسها ... نيلها
إرادة شعبها مالهاش نهاية