يا الله

2012- ص 09:28:27 الاحد 15 - ابريل
صورة تعبيرية
نصر فتحى اللوزى
هل النسيم ويا زيطة وصياح
نسيوا الأدان حي على الفلاح
منين نجيب والمكن بنا ساكت
والكل نايم وعايز يجيله نجاح
ياحزنى
***
ازاى هيبقى عيد للنسيم والطير
والجيوب خاليه حتى من قطمير
بيحلموا وهمه فى الميدان واقفين
الصوت عالى والإيدين بلا تشمير
ياخوفى
***
نسيوا أغانى هيلا هيلا يالا يارجاله
نعطش نشرب عرقنا شهد لا محاله
نجوع ناكل من زرعنا فى أراضينا
ولا ننتظر من بره شيك ولا حواله
ياحزنى
***
إزاى هيبقى عيد للنسيم فرحان
والطير سكت عن الغنا زى زمان
والساقية سكتت عن أغانى الميه
ليه والزرع لينا ملهوف عطشان
ياعجبى
***
ياناس تعالوا نرجع زى زمان
نجدف سوا بسفينتنا لبر أمان
هنكتفى بإنتاجنا لا كمان تصدير
نعيش فى سعادة نموت الحرمان
يا أملى
***
بلاش كل واحد يركب مننا راسه
يسيب المحراث ينسى كمان فاسه
قوللى ازاى زرعنا من غيرنا يكبر
اللى ينسى زرعه ده يبقى إفلاسه
يا خوفى
***
تعالوا نرجع للمكن بنا صوته
نكتب للكسل نهايته كمان موته
والخير هييجى بس شويه شويه
وهنحقق نهاية الحلم ومربوطه
يا رجائى
***
بكدا نعيد ونشم نسيم إنتاجنا
الكل ياكل الخير يمتد لأحفادنا
بعد عمر طويل دايما يفتكرونا
ونبقى حافظنا على مجد أجدادنا
يا أملى
***
تعالوا نشم النسيم ياولاد حتتنا
وننسى الوقفات وننسى غلطتنا
ونركب المركب نجدف لبرنا التانى
نرجع معانا لأولادنا لقمتنا وهدمتنا
يا أملى
***
والله النسيم ما يكون إلا ما أكون مستور
وجيوبى مليانه والساقية كمان بتدور
والطيور فى أعشاشها من قش أراضينا
وسمكنا ينادينا من الساقية بنا مسرور
يا ربى
***
من مية الساقية شربت وأتوضيت
لربنا رفعت إيدي بانكسار له ودعيت
يارب إحفظ بلدى وكل الأهل والأحباب
ارزقنا الهداية للبنا احنا زى ما وصيت
يا ربى
***
يارب اجعل نسيمنا هو عنا رضاك
واجعل زهورنا عسل لكل من ناداك
فى فجر كل يوم بتحقق لنا دعواتنا
الأمن عندك احنا عايشين فى حماك
يا ربى
***
يا رب ولى علينا من يخافك فينا
يصلح الأحوال يبدل فينا مآسينا
يخلى الشمس فى أحلامنا سهرانه
يبدل دمعنا ينسينا الحزن فى مآقينا
يا ربى
***
بعد ما كتبت كل اللى كتبته أعلاه
دموعى بالحب سالت لربنا فى علاه
أنا دايما حسن الظن بربنا الخالق
وهو عند حسن ظن العبد بمولاه
يا الله