قالوا للأصيلة مالك حزينة.. قالت ولادي كانوا أهل وعيلة.. وصبحوا دلوقتي متفرقين تايهين وقلوبهم بخيلة.. لا حبهم زاد ليه ولا خافوا عليا.. وثورتهم الصابحة الندية.. حولوها لدم وهم وغم وأحزان ماليه عيونهم آسية.. هو جزائي إني حبتهم.. وقلبي كان بيضمهم بحنية.. وترابي كان ستر.. وسمائي ضليلة يا حسرتي عليهم.. دا كنت أم الدنيا أصبحت أد الدنيا.. علي لسان كل واحد فيكم.. وحبي دايما ليكم.. دا أنا لسه يا ولادي أصيلة.. وبستني منكم كلمة جميلة تجبر بخاطري.. وتكون مسند ليا في أيامي اللي جاية مع النسمة والهمة العليلة. وادي الطريق.. وادي السكة.. وإن كان مفروش بشوك.. علينا نجمع ورده.. ونعطره بدموعنا.. بس يا ولادي لازم تعرفوا العدو م الصديق وتزرعوا بذور الأمل بالعمل.. عمر الزمن ما استني كسول ولا مخبول ولا نايم في العسل.. وإن شفتوا في عيون الشباب أحزان.. امسحوا دمعته وعدوا.. وقد مولوا الخير تلاقوا بالأحضان بيجري ويرمح ويمرح ويبني معاكوا في أرضي ويحمي عرضي.. وياريت تاخدو بايديه.. ولاحلامه ما تهدوا. يا حزن قلبي علي ولدي.. وعلي بنتي.. وع الصبايا ورا قضبان.. وزمان مليان أحزان.. والجريمة أنهم قالوا وعبروا وفتحوا عيونهم قبل الأوان.. لا عمري سمعت ولا شفت ان حيطان السجن.. بتحاسب علي الكلمة اللي طله م اللسان.. وسايبة الظلمة والمجرمين يفسدوا في أرضي وينهشوا في عرضي.. وبيسرقوا الفرحة من الأبدان كلمة وبقولها لأصحاب القرار.. بلاش تزرعوا الحقد والغل في قلب الميدان وعلموا بناتي إزاي تكون رابعة زي خامسة زي أولي زي تانية الكل علي أرض الوطن إنسان.. وإن الحرية لكل البشر حتي لو اختلفنا وافترقنا وضاع من قلبي الأمان. أنا عشت من آلاف السنين.. بحنان وحنين.. وتاريخي مكتوب علي كف الحياة بعرق وطين.. فرعوني وقبطي وإسلامي.. الكل عاش في أحضاني أمين.. وكانت شطاني جايبة أفراحي وأحزاني من غير خلاف بين عقيدة ودين وكان الصليب عنواني.. والهلال في القلب قبل العين.. لا عمري عرفت فرقة.. ولا ظهر علي سطحي إخواني ولا علماني ولا ليبرالي ولا حتي اللي من غير دين. تلات سنين دلوقتي.. والكل بيسرق وقتي.. الهم زود حيرتي.. والحزن شتت فكري.. وان كنتوا عايزين أرضي تصبح حلب وعراق.. أنا أرضي يحميها ربي هو مصيري وصبري.. وإذا كنتوا ح تتخاصموا.. وتاخدكم التوهة.. أيامكو ح تعدي في الضحكة ح تفتكوا.. ويصبح دا مكتوبكوا.. وإن كانت سنيني فاتت.. وأيامي في قلوبكم ماتت.. تعالوا نصحي من تاني ونلم شمل الكل.. وننسي الجراح والغل.. ونزرع شموع الفُل.. ونبني الأمل ونطُل علي دنيا فيها العلم.. والحلم نمسكه بايدنا ونمشي في طريق ما يضل.. لو عرفنا الحل.