طريق النور

نفسي في ولد..

يا بلدي يا أرض الخير.. يا بهية.. يا حنية.. يا ضحكة صافية في الصبحية.. ودمعة حيرانة في المغربية.. شايف الحزن في عيونك يا بلدي.. بيألمني.. يعلمني.. يكلمني.. أحاول أسمع نداه.. شكواه.. ألقي القلب م الهم.. يقول الآه.. يبكي.. يقول كل اللي جواه.. الدمعة تسري معاه.. تسيل ع الخد تجري وراه.. ولما أقرب منك.. أحس إنك.. خايفة من بكره.. تقولي في سرك قلبي علي ولدي انفطر.. وقلب ولدي ياناس صبح حجر.. يا حزن قلبي علي ولدي.. اللي خان.. وباع شرفي.. وعرضي.. لكل جبان.. وباسم الدين.. عايز يدمرني.. يأجرني.. لأصحاب النفط والقطران.. عملاء اليهود والأمريكان.. الجاسمين ع المال والنايمين مع الموزة.. والتفاحة.. والرمان..
يا ناس.. يا هووه.. إنجدوني.. إرحموني.. هاتولي الأمان زي زمان.. ومش عايزة م دنيتي غير ولد يعرف ربنا بحق وحقيق.. ويعرف ان كل البشر إنسان.. مفيش فرق خالص بين قبطي.. ومسلم.. ولا إخواني.. ولا سلفي.. ولا شيعي.. ولا علماني.. ولا ليبرالي.. ولو كان حتي زرعه شيطاني.. ده ربنا ياناس لو تعرفوه بيرزق الكافر زي المؤمن والرزق عنده بالعمل والجد والإيمان.. إيمان القلب مش بالصورة والسبحة.. وادقن طويلة التيلة.. والحجاب والنقاب العثماني..
نفسي في ولد.. يكون ولد.. دمه حر.. نفسي أخلص من الحزن والأنين.. والدمع اللي مالي القلب والعين.. نفسي يعدي عليا يوم تلاتين من غير دم.. لا أخ يقتل أخوه.. ولا يكفره.. ولا يقول علي أخته يا سافرة.. يا كافرة.. علشان ده عايشة علي أرضي.. وأكلت وشربت من نيلي.. وخيري.. وعارفة اللي في ضميري..
نفسي في ولد.. يلم شمل الكل ويعمل قعدة عرب.. يشكل مجلس رئاسي من كل راجل شريف.. وعفيف اللسان.. واليد.. يحبني بجد من قلبه.. مش تقليد.. نفسي في ولد.. يهدي ولادي للحرية.. واللقمة الهنية.. ويزرع ويقلع في طيني.. يزيح الحزن من عيني.. ويزيح الهم من قلبي.. يفجر طاقة الشباب.. يفتح كل باب.. يحمي من تاني التراب.. علشان يعيش كل البشر علي أرضي من تاني أحباب أصحاب.. مش أغراب.. نفسي أنسي اللي فات.. وولادي ينضفوا قلوبهم من الحقد.. والغل.. والخراب.. ويرجع ميزان العدل.. ويلبس روب النقاء.. والصفاء.. ويحكم بالقانون ويعرف يعني إيه ثواب وعقاب.. نفسي في ولد.. ولد.. ولد.. يكون شارب من حليبي.. يكون سندي.. وحبيبي.. يكون عكازي.. وملاذي.. لا يكون سجان ولا قاضي.. يكون راضي.. يبص للحاضر ويتعلم من الماضي..
ومهما تاه الخلق.. ومهما ضاع الحق.. أنا شايفة نقطة ضوء.. جاية وفاتحة الطريق بهدوء.. جاية متخفية وإيديها متحنية بالحنية تطبطب عليه وعليكم أنتم ياولادي الباقي.. ولو كان طريقكم صعب.. عدوه من غير حرب وضرب.. وانزعوا الخوف من قلوبكم.. وبلاش تقسموني اتنين.. ما بين تمرد.. وتجرد.. وتحريض.. وتهديد.. ويقوم ولدي الكبير مع ولادي.. قومة رجل واحد ويقول الكل في واحد.. يوحد الواحد.. يارب ياواحد.. ويرجع لحضني زي زمان ونعيش كلنا في أمان..