أهو كله محصل بعضه.. ولا فارقه بكره من بعده..

الحوار الأول : بين الطلبة :
_ هي يعني جت عالامتحان مالبلد بايظة و أصلا محدش بيشتغل بشهادته دلوقتي.
الحوار الثاني: بين أم و بنتها :
_ مافيش فرق بين راجل والتاني كله زي بعضه واهو الجواز بطيخة.
الحوار الثالث: بين صديق وصديقه:
_ اللي بيشتغل رئيس زي اللي بيشتغل غفير مش فارقة يعني...ده حتي مكسب الغفير ممكن يبقى أكبر وعلى الأقل مش بيتحسد.
أصبح الشعب في حالة لا مبالاة غريبة، ومع تطور الأحداث اليومية يزداد الأمر سوءا ويأسا من حال البلد وما ينعكس على أحوالهم منها.
و تتعمق السلبية في قلب الشعب يوما فيوم، بالرغم من وجود البعض ممن يعلو صوتهم من أجل المنادة بقضية خاصة بهم، إلا أن بداخلهم يأس رهيب من حال البلد.
تقول "جهاد" يعني هتفرق معانا الحياة في إيه ده حتى النيل اللي عاملينه واجهة لينا بقى مش بتاعنا و كل حاجة بتأكد إننا يا نموت غرقانين يا نموت عطشانين.
و قال "محمود"....."قالك" مهو لما يطلع عيني مذاكرة و أحرم نفسي من مليون حاجة عشان أنجح وأبقى حاجة وفي الآخر ولا أي حاجة؟! تبقى البلد نفعتني في حاجة؟!....طب حد يرد يقولي حاجة ده أصلا لو عنده حاجة.
و علقت "شيرين" ده حتى المرتب مش بيكفي يعني لو مرتب 1000 جنيه ، هيبقى 200 على الأقل مواصلات، 600 أكل و كهربا وميا، و 200 بتروح علاج و حاجات بتيجي فجأة، لسة بقى في فاتورة تليفون و شحن موبايل و إيجار شقة....احنا شعب بيموت 100 مرة في اليوم.
و أوضح "طه" طبيعي ميبقاش في حاجة فارقة لأن البلد مبقاش فيها كبير، كل واحد بقى يعمل اللي عاوزه وعايش بدماغه ومش لاقي حد يحاسبه، وبقينا بتوع أي حاجة في أي وقت يبقى ازاي في حاجة هتفرق؟!