صراصيرك يا مصر

قال لي وهوه »بيغلي«.. فشر براد شاي سايبينه علي النار من ساعة.. هي خلاص كل اخبار البلد خلصت مبقتوش لاقيين حاجة تكتبوها الا صحة بسلامته الريس وشغالين لي يوماتي .. تومرجية لسيادته.. الضغط طلع.. نزل.. ده جاله اكتئاب.. ده نام.. ده متشعبط في ماسورة السرير.. لغاية ما اتنفخنا. اصطبحنا.. فيه ايه ع الصبح.. باقولك ايه متردش عليا بزهق.. يا خويا اعتبرني من الفلول ولا الحرامية اللي ليل نهار »فاردين« لهم صفحات.. فلان طالع عربية الترحيلات.. وتك صورة.. فلان نازل من عربية الترحيلات.. تك صورتين.. هو دا اللي شاغلكم بس.. يا عم خلص قول بقي ..بص ح اقولك.. بس عارف لو »اتريقت« مش حيبقي كويس.. وحتبقي زعله.. علي النعمة لو هزرت لاحط صورتك علي يافطه في ميدان التحرير.. وانت عارف.. ماشي قول.. انا عندي ليك قنبلة حتكسر الدنيا.. يا سيدي قول.. انت جاهز للصدمة.. جاهز.. الصرصار في بلدنا تمنه 002 جنيه .. نعم يا خويا.. مش بقولك هتاخدها هزار.. ايوه زي ما بقولك.. ب 002 جنيه، وهو ميت كمان.. ولامؤاخذة دا من ايه؟.. دا يا خويا من تركيزكم علي الكلام العبيط والهايف وسايبنا ننطحن ونتسرق ويطلع تلاته ايمانا. مش فاهم.. باختصار.. طلبت شركة »رش« صراصير علشان ترش »المطبخ« بعد ما خلصوا وقف الجعر الحرامي لمراتي وقالها ايديك علي 009 جنيه.. وهي طبعا مش غرمانة حاجة.. دفعت.. ولما رجعت .. قالت لي.. رحت المطبخ وانا مصدوم »صدمة عبد الحليم حافظ في فيلم الوسادة الخالية«.. قلت حلاقي جيش مسفوك دمه من الصراصير علي الارض.. بصيت لقيت القتلي كلهم اول عن اخر اربعة.. حاولت اكلم الشركة تقريبا كده قالولي .. امك في العش ولا طارت.. طب لامؤاخذة انا ممكن اعمل ايه لواحد مغفل زي سعادتك ما أنا كتبت علي الموضوع ده قبل كده وحذرت »الهبل« امثالك .. ما تهزرش.. انتوا لازم تكتبوا علي »النصب« اللي بيحصل فينا والحرامية دي تتمسك.. والحكومة لازم تتغير علشان سايبنا نتسرق.. وهي دي بقي القنبلة.. القنبلة جاية.. انا فكرت ازاي نستفيد من مصيبتي لاجل الوطن.. قول يا فالح.. من الناحية الدولية.. هي فيها دولية.. اه فيها.. بدل ما احنا بنشحت من العالم اليومين دول يروح وزير المالية ويقول للدول دي هو انتم فاكرين الفلوس اللي بتدهولنا دي فلوس ده احنا عندنا »المواطن«.. بيقتل الصرصار ب 002 جنيه.. وياخد فاتورة من الشركة وكشف بعدد الصراصير في مصر وما اكثرهم.. ويضرب .. واقبضي يا مصر. او يعد الصراصير اللي في البلد ويحاسب شركات الرش الصرصار ب 001 جنية! وأضرب في الخزنة يامعلم.. والله كلامك صح ملعون ابو اللي يسمع كلام عيل زيك.
قول لي .. هو اسمه عصام شرف.. ولا ضيف شرف.