الفرخة.. ولا البيضة

لو كنت في »سني«.. أكيد حتفتكر.. ان مصر في الستينيات كان في نيتها.. تصنع لنا سيارة لا مؤاخذة للركوب.. وارسلنا ايامها بعثات تجوب العالم طولاً وعرضاً.. وغني لها ولجمالها وزراء الصناعة سنين وسنين .. وقعدنا مستنين ولحد النهارده.. وشرفك.. لا صنعناها.. ولا شفناها.. لا.. ومن خيبتنا كنا مسمينها »نصر«.. وطبيعي حتسأل ليه ما اتعلمش.. لاننا نعشق.. الرغي والحواديت.. وقعدات القهاوي .. ووقفة النواصي .. لكن نعمل حاجة مش مهم.
وقصة السيارة المصرية تتكرر في كل شيء.. خد اللي احنا فيه اليومين دول حوارات.. ندوات.. خناقات افتكاسات. علي مين يسبق مين الدستور .. ولا انتخابات مجلس الشعب .. وكأننا هنخترع الذرة.. أو كأننا بلد خلقه عن كل البلاد.. مع ان اي حد من اللي بيرغوا في ودانا ليل نهار وعاملين حلقات ذكر للاجابة علي هذا السؤال.. »شد« له كتاب تاريخ من اللي بيدرسوه لعيالهم في اعدادي.. عن مصر ونظامها السياسي.. حيلاقي مكتوب فيه علي الشمال ان الاشكالية دي اتحسمت من زمان ومحدش فيهم دريان.. فمصر قام فيها ثلاث ثورات »9191 سعد زغلول - 2591 عبدالناصر - 17 ثورة التصحيح السادات« وبعد كل ثورة من دول اتشكلت.. . لجنة لصياغة الدستور ، وبعد ماخلصوا الدستور بحوالي سنة او اكتر.. عملوا الانتخابات.. حسيت بحاجة.. »دي ناس كانت فاهمة و عاوزة »تنجز« وتخلص لكن احنا »عاوزين« نعك«، ونقعد نتفلي ونرغي سنة كمان .. واللي عاوز يفتي من بتوع فرز الفضائيات.. ياخد وقته.. وللعلم.. مكتوب في نفس الكتاب لاخواني أصحاب التقفيصة بتوع الفرخة الاول ولا البيضة.. يا بيضة.. لجنة الدستور.. أو الناس اللي فيها محدش دور عليهم.. ولاقالوا انت فين ياعلي .. ولا انتخبوهم. كما يحلم الاخوان لان الشخصيات »اللي« ممكن تحط الدستور في مصر .. معروفين.. كويس قوي وبالاسم، وعن هذه النقطة يقول كتاب »تاريخ« أولي اعدادي »ب« ان من وضعوا الدستور لم.. يكونوا بمفردهم لانه.. وتحديدا ايام السادات.. اتعملت لجنة مهمتها انها »تتلقي« أي اقتراح من أي مواطن - ان شاالله »سباك« قام في دماغة يسلك له قانون مسدود - وفرز كل مايصلها من اقتراحات وأراء وترسلها الي لجنة وضع الدستور.. حتي يكون الدستور معبرا عن رأي الشعب كله.. سمعني بقي.. غنيوة.. ياللي اتحرمتم من التعليم الفرصة لسه قدامكم.. واهديها الي كل »الحبايب« وخاصة اللي راكبين السيارة »النصر«.

هوه وزير المالية.. »غير النظارة« بتاعته.. اللي كان لابسها أيام ما كان في لجنة السياسات .. ليه؟!
أول امبارح قال.. انه »شاف« خط الفقر.. عند 007 جنيه.. قبل كدة كان شايفه عند 99 جنيه.
سلامة الشوف.