أصبحت سرورا

علي القهوة قابلني واحد من محترفي الظهور في الفضائيات من اللي غاوين يرفعوا في الشعارات وينزلوها من غير مايقروها، وقال للقهوجي »بتريقة« هات للباشا »سحلب« علي حسابي، خلاص المحكمة »حتحل« المجلس ومش حيلاقي حاجة يكتب عنها.. قلت في عقل بالي ارد عليه ولا أشرب »السحلب« اهوه أحسن من عينه.. بس لما لاقيت »القاعدين« بيبصوا لي قلت يا واد لازم ترد ماينفعش دورك »التنويري« تجاه رواد القهاوي يقف عند رفع زر النور في الاوض الضلمة.. وأهي فرصة »اتقمص« شخصية فتحي سرور، وافرد علي الخلق اللي قاعدة.. بكلمتين في القانون فقلت له.. مجلس إيه يا »كبونش« اللي تحله المحكمة.. ماهو أنت لو كنت كملت »علامك« ماكنتش تهيص مع الهيصة وتقول الكلام ده!! الواد مش يسكت قام.. ماسك.. الصينية وقعد يطبل عليها ويقول باطل.. باطل.. حتحله.. حتحله.. يخرب بيت كده.. افهم.. يا متخلف.. »المحكمة« مش اختصاصها انها »تبطل« عضوية النواب.. دي شغلة.. المجلس قال لي.. انت حتفتي.. مش بيقولوا.. ما بني علي باطل فهو باطل!!.. يبقي خلاص.. »حيحلوه.. حيحلوه«.. لا يا حمار حيخلوه.. حيخلوه.. قال لي بااقولك ايه.. انت عاوز تعمل فيها »فلة« ادام القهوة »الكلام« ده معروف والدنيا كلها بتتكلم فيه.. قلت اسمع »يارزل« الكلام اللي بيتقال ده مش قانوني.. دي ناس بتلعب سياسة وبتقول أي كلام »للقفف« أمثالك.. القانون ادي المحكمة الحق انها تعمل اللي هي عاوزاه في »المرشح« طول فترة الترشيح.. تقلبه من فردة عمال لفردة فلاح تشتطفه تحميه.. تقول ترشيحه ماشي.. مش ماشي هي حرة.. بعد الانتخابات ما تخلص، وتعلن النتيجة.. المرشح بيتحول لنائب كده.. بقي من حق المجلس.. هوه اللي يبطل عضويته.. ما يبطلهاش.. المحكمة مالهاش دعوة القانون كده.. مش لادد عليكم غيروه بس »ماتفتوش« فيه.. يعني كده المجلس مش حيبطل ولا حتحله المحكمة.. يا قهوجي ابقي حاسب الاستاذ علي السحلب والشاي بتاعي.