إحم إحم

تبات «موبينيل» تصبح «أورنج»

- يرضيك ياولدي أنام وتليفوني موبينيل أصحي الصبح ألاقي رسالة بتقولي مبروك إنتي بقيتي أبصر أورنج إيه ولا بتاع إيه؟
استيقظت فجرا علي مكالمة من أمي في البلد:
- صباح الخير ياولدي ياتري صبحت علي مصر بجنيه انت ومراتك وعيالك ولا لسه؟
- يامه طلباني الفجر علشان كده؟ عموما أول ماقفل معاكي حاصبح عليها بحتة بخمسة.
- خمسة إزاي ياولدي وانتوا سبعة في عين العدو؟
- أصل مصر عملتلنا تخفيض علشان ظروفنا.
- شكلك فضيان وعايز تدخل معايا دور قلش وأنا بصراحة مش فاضيالك وطلباك علشان حاجة مهمة.
- لو قصدك يعني عايزة تفكريني إننا في شهر مارس فمتقلقيش أنا فاكر كويس.
- لا لا لا الموضوع أهم من كده أنا عايزاك في حاجة تانية خالص.
- خير يامه قلقتيني أبويا كويس؟
- كويس وزي الفل الحمد لله أنا بس كنت عايزة رقم موبايل المهندس سواركيس.
- مين ده يامه يكونش قصدك السويركي بتاع التوحيد والنور ولا ساركوزي بتاع فرنسا؟
- مش باقولك فاضيان وأنا مش فايقالك؟سواركيس ياولا بتاع موبينيل.
- ساويرس يامه قصدك ساويرس خير يامه عايزة تليفونه ليه؟
- معاك ولا هتضيع وقتي علي الفاضي؟
- لا مش معايا انتي فاكرة ساويرس ده صاحبي ولا بنتعشي مع بعض كل يوم؟
- وميبقاش صاحبك ليه يعني؟هو أحسن منك ولا أغني منك؟
- ههههههه الله يحظك يامه لا مش أحسن مني ولا أغني مني طبعا هههههه لكن خير عايزة ساويرس في إيه كده علي الصبح كفي الله الشر؟
- يرضيك ياولدي أنام وتليفوني موبينيل أصحي الصبح ألاقي رسالة بتقولي مبروك إنتي بقيتي أبصر أورنج إيه ولا بتاع إيه؟
- طب وماله يامه عادي تفرق معاكي إيه أورنج ولا موبينيل؟
- إزاي بقي يعني هو مش المفروض الشركة كانت تاخد رأينا قبل ما تغير اسم الشركة؟
- يامه أصلك مش واخدة بالك موبينيل اتباعت لشركة تانية إسمها أورنج.
- مقلناش حاجة لكن تفتكر امك قرطاس جوافة ولا مليش لازمة في البلد دي؟
- لا يامه لا سمح الله بس انتي كنتي عايزة منهم إيه مثلا؟
- كانوا يسألونا ياولدي ولا ياخدوا رأينا بدال ما نتفاجيء كده،مش إحنا برضه العملاء إللي الشركات دي كل يوم بتاخد فلوسهم؟
- يامه الشركات بتاخد فلوسنا بمزاجنا ومحدش ضربنا علي إيدينا علشان نجيب المحمول.
- طب ياولدي مش كانوا ياخدوا رأيي قبل مايبيعوا الشركة ولا يغيروا اسمها؟
- ومن امتي يامه فيه حاجة بتحصل في البلد بيتاخد فيها رأيك؟قوليلي كده من ساعة ما اتولدتي لغاية دلوقتي مين أخد رأيك في أي حاجة حصلت؟إحنا يامه ملناش رأي وماينفعش معانا غير سياسة الأمر الواقع.
- متدخلنيش في السياسة اعمل معروف ووفر كلامك ده لنفسك.
- دي مش سياسة يامه بلاش كده طب صارحيني حد خد رأيك قبل مايجوزك أبويا؟
- فكرتني صحيح أبوك بيقولك ياريت تقول لطارق عامر إنه زعلان منه!
- طارق عامر محافظ البنك المركزي؟غريبة وأبويا يعرفه منين وزعلان منه ليه؟
- إزاي ياولدي يطلع في التليفزيون يقول إن شركة جنرال موتورز واخدة قروض بملايين الدولارات،مش المفروض إن ده سر بينه وبين الشركة؟
- في دي عندك حق يامه.
- قوله أبويا بيقولك لو ده اتكرر ماتلومش إلا نفسك!
- وابويا في ايده إيه يعمله يعني يامه؟
- ابوك بيقول هو مش حايستني لغاية لما المحافظ يفشي تعاملاته المصرفية وبيفكر يسحب التلات آلاف جنيه إللي محوشهم في البنك!