حكايلت رمضانية

واضح كده إن فيه عكوسات معمولة للدكتور أحمد نظيف رئيس الوزراء.!! يعني بكل بساطة معمول له عمل!! رغم كل اللي الحكومة بتعمله عشان تواجه الازمات المتلتلة اللي انحدفت علينا مرة واحدة... العملية ملخبطة والناس دلوقتي بتشتكي من كل حاجة!! الأسعار مولعة.. التعليم تعبان.. والصحة علي أد الحال والكهرباء بتقطع والمية ناقصة.. مش عارف إيه السر ان كل المشاكل كده تحصل مرة واحدة وفي توقيت واحد .. وده كله كمان بيحصل واحنا شغالين خلفه ..الله ينور ... العدد في الليمون وتنظيم الأسرة في بلادنا لسه عباره عن ندوات وحفلات استقبال.. وحسنين ومحمدين في واد والحكومة بتأذن في مالطه .. يا ناس يا شر كفاية خلفه .. لكن لا حس ولا خبر.!!
المشكلة مين اللي عامل عمل لرئيس الوزراء؟! يا تري وزير نِفسه يخلعه ويبقي رئيس وزرا.. واللا مجموعة من الوزرا اتفقت مع بعضها انها تروح للشيخ حسنين أبو سر باتع عشان يعمل عمل يلخبط رئيس الوزرا!! طبعا معاكو حق.. حاجة تحير اللي ما يتحيرش؟! لكن قبل ما ندور عن شيخ واللا شيخة يفكوا العمل ياريت الدكتور أحمد نظيف يساعدنا شوية عشان نحدد العمل ده مدفون فين؟! هل في مقر مجلس الوزرا واللا في القرية الذكية؟!
أنا شخصياً أؤكد ان العمل مدفون في القرية الذكية وان فك العمل يبتدي لما رئيس الوزرا يبطل يعمل اجتماعاته هناك.. لانه حتي بروتوكولياً مش أد كده.
لأن مقر مجلس الوزراء في منطقة لاظوغلي وسط الناس والزحمة وأكيد الزحمة بتولد أفكار جديدة وبتخللي الواحد يبقي قريب من معاناة الناس بعكس الحال في 6 أكتوبر.. الناس هناك رايقة وفايقة!!
تاني حاجة في فك العمل إن رئيس الوزرا لازم يوري بعض زملائه الوزرا الوش التاني.. وبلاش نقول العين الحمرا لأني عارف ان الدكتور نظيف مؤدب ومهذب أكثر من اللازم وشغل رئاسة الحكومة ساعات بيبقي عايز كده وكده.. مينفعش تبقي الأمور سمنه علي عسل علي طول!! والوزرا زيهم زينا.. مش ملايكه يعني.. وافكارهم احيانا بتكون من النظريات والكتب اللي اتعلموها وملهاش أي علاقة بالواقع العملي.. لكن بصراحة فيه بعض الوزرا ماركة ابوالعريف.. بيفتوا في أي حاجة وبيعرفوا كل حاجة ودول احيانا كتيرة بيبقوا عاوزين وقفة!!
ساعتها بس ممكن العمل ينفك لوحده وممكن الامور ترجع لمجاريها رغم ان الوقت بقي متأخر جدا.. وياخوفي يا بدران ليبقي ده آخر رمضان في الشغلانة اللي ما يعلم بيها إلا ربنا!!