إحم إحم

تنكد عليا ليه وأنا نازلة أدلع في الشانزليزيه!

يعني طالباني في فرنسا ومكلفاني الشيء الفلاني علشان تقوليلي مبارك طلع براءة؟ طب وايه الجديد؟
كنت في شارع الشانزليزيه بقلب العاصمة الفرنسية باريس عندما رن جرس الموبايل ولولا أنني متأكد أن الصوت الذي كان يحادثني عبر الهاتف من البلد هو صوت امي - متعها الله بالصحة والعافية - لقلت إن من تحادثني ربما طلبتني عن طريق الخطأ حيث بدأت كلامها قائلة:
- مبروك يا ولدي البراءة!
- براءة ايه يامه هو انا كنت كفي الله الشر متهم في أي حاجة؟
- الله هو انت ماسمعتش الأخبار ولا محداكش راديو في فرنسا؟ قال علي رأي محمد قنديل ع الدوار ع الدوار راديو بلدنا فيه أخبار.
- يامه وغوشتيني فيه ايه؟ الله لا يسيئك الأغاني الوطنية دي بتفكرني بالنكسة، حصل ايه في البلد وقعتي قلبي.
- مبروك عليك وعلينا كلنا يا ولدي براءة مبارك!.
- يامه هو انا يعني اكمني قلتلك قبل ما اسافر فرنسا ابقي اطلبيني في اي وقت والمكالمة هتبقي علي حسابي تقومي يعني متأخذينيش تطلبيني في الفارغة والمليانة؟
- أنا كلامي فارغ يا قليل الأدب!
- لالالا يامه سامحيني مش قصدي أنا عارف ان كلامك كله مليان بس يعني باقولك كده الرصيد اللي شحنته قبل السفر مش هيكفيني ولا حتي يوم واحد، المكالمة دي بتكلفني الشيء الفلاني حتي العيال باكلمهم علي الواتس اب مش بالتليفون.
- بلا واتس أب بلا واتس ام بلا كلام فارغ، قول بقي انك شايل الرصيد لمرتك وعيالك وكمان بخلان علي امك بمكالمة، يعني بسلامتك خايف علي رصيدك ومش خايف علي مشاعر امك؟ يا خسارة تربيتي فيك، خليك عندك مرزوع في الشانزليزيه وبلاش تعاود احسن!
- يامه لا مش قصدي طبعا، فداكي رصيدي كله ومشاعرك في الحفظ والصون لكن يعني طالباني في فرنسا ومكلفاني الشيء الفلاني علشان تقوليلي مبارك طلع براءة؟ طب وايه الجديد يعني ثم أنا مالي بالحكاية دي؟
- يابني هو مش ابوك اسمه مبارك وكان طول ما مبارك بيتحاكم الناس بتتريق عليك وتقولك شوفلك اسم تاني؟ خلاص أهو علي الأقل دلوقتي تقدر ترفع راسك من جديد ومحدش يقدر يعايرك باسم مبارك!
- يامه الله لا يسيئك ارحميني أنا مش عايز الراجل ده يخسرني الدنيا والآخرة ومش عايز أقولك كلمة تخليكي تغضبي عليا، أنا سايب مصر كلها وباتمشي في أحلي شارع في العالم تقومي تفوقيني علي خبر ينكد عليا كده!
- يومين في فرنسا يغيروك كده؟، نكد إيه وانا باقولك أبوك طلع براءة؟
- طيب يامه كلها ساعتين واطلع علي شارل ديجول سيبيني بقي استمتع باللحظات الأخيرة دي!
- هو ديجول ده يعني احسن من مبارك؟
- لا يامه ديجول ده المطار اللي هاركب منه الطيارة.
- طب اسمع بقي انت تيجي من عندك علي هنا علي طول وتاخدلك يومين تلاتة أجازة نحتفل كلنا هنا بالبراءة ومتنساش تجيبلي معاك اخر اسطوانة للمرحومة داليدا قبل ما تنتحر.
- انتي عارفة مليش في الأجنبي ومعرفش اسمها ايه الاسطوانة دي.
- اسمها: تنكد عليا عليه وانا نازلة أدلع في الشانزليزيه!