المستحيلات ال15 للمصريين على "فيسبوك"..تحياتي لترعة المحمودية و بلطيم

رغم أن جميع المؤشرات تشير إلى تراجع شعبية الفيسبوك عالميًا، إلا أن الأمر يتخلف في مصر، فلكونه شرارة ثورة 25 يناير، تضاعف عدد الفيسبوكيين في مصر ليصل إلى 7 مليون مستخدم. وبعيدًا عن الغول والعنقاء والخل الوفي، فللمصريين على "فيسبوك" مستحيلات أخرى، حيث لا تجد شاب "فيسبوكي" مصري من دون الآتي:
- مستحيل تلاقي بنت مكتبتش..صمتي لا يعني جهلى بما حولي ولكن ما حولي لا يستحق الكلام.
(ده على أساس أن تفجير كنسية القدسين وثورة 25 يناير والدبابات اللي في الشارع كانوا بيشفوها كل يوم)
- مستحيل حد يكتب حاجة وميعملش لايك لنفسه
(تحس كده أنه بيخلص كتابة، ويبص عليها ويقول إيه العسل ده، فنان من يومي، لايك)
- مستحيل شاب يشوف واحدة مستخدمة صورتها الشخصية ك صورة للبروفايل وميعملهاش إضافة
(حتى لو كانت شبه عبد الباسط حمودة)
- مستحيل تلاقى بنت تكتب كومينت من غير ما يكون فيه كلمة إنجليزي
(أكيد كل واحد وتعليمه، وبعدين هي مش أقل من هانا مونتانا)
- مستحيل تلاقي شاب ميعملش "كوبي باست" ويكتب "ستاتيوس" مألفها من دماغه (إلا لو كانت: يا جماعة أنا ابويا مات النهاردة أو حله الملوخية لسعت أمي)
- مستحيل تلاقي بنت متعملش لايك لصفحة فيها كلمة تامر (حتى لو كان تامر من غمرة)
- مستحيل واحد يرفع صورته الشخصية من غير ما يعمل "تاج" لكل البنات إللي ضايفهم
(حتى لو كانت صورة عبد الوارث عسر في فيلم البؤساء أحلى منها)
- مستحيل ماتلاقيش واحد قال يا جماعة حرام حمادة هلال ملوش ذنب العيب على مؤلف الأغنية
(يذكر أن شهداء 25 يناير، هم نفسهم إللي ماتوا في أحداث يناير، ومش ماتوا دول راحوا وفرقوا الحياة، شوف حكمة ربك يا مؤمن)
- مستحيل تلاقي بنت تكلمك في الشات من غير ما تبدأ كلامها ب هاي
(وده على إعتبار أن كريستين ستيوارت بتكلم روبرت باتينسون)
- مستحيل تدخل صفحة على الفيس من غير ما تشوف واحد كاتب : ممكن تبادل؟
(أستغفر الله العظيم، هما بيتبادلوا إيه بالظبط ؟)
- مستحيل فيه شاب مكلمش بنت وقالها أنه فاتح "اللاب"
( مع أنه بيبقى مأجر نص ساعة في "السايبر" اللي على أول الشارع)
- مستحيل بنت مكلمتش شاب وقالتله أنها بتصيف في مارينا
بين قوسين (تحياتي لترعة المحموديه و بلطيم).
- مستحيل واحد متريقش على الراجل والست والجلابية اللي بيقفوا ورا الناس كلها
(والبلفور كمان عشان فيه ناس بتزعل)
- مستحيل واحد متريقش على أونكل معمر القاذفي
( هنا أقصد العالم كله مش مصر بس . مع أن القذافي هاي كلاس وبياكل شيكي دودو وعندو خاصية ال "أم أم يووووووه")