يوميات فوزية.. ( البانيه)!

فاكرة البانيه ياحبيبتي؟ منك لله ياراجل..هو انت لازم تنكد علينا.. هي عادتك يعني ولا هتشتريها.. يافوزية ما أنا قلت لك تحويشة عمرنا الألف جنيه الورق اللي إحنا شايلنها في البريد، نجيب بيهم بانيه ونستثمرهم، والمكسب بالنص ونشيل الباقي في بنك الفيومي، لكن انت ماسمعتيش كلامي ياولية، ده أنا عمري مالقيت الفراخ حاطة منكير قبل كده، ده انت يافوزية عمرك ماحطيتي المونكير ده.. وفي هذه اللحظة كشرت فوزية عن أنيابها
انت باين عليك اتجننت يافوزي بقولك إيه ياخويا: نام بقا وخلي ليلتك تعدي.. تحويشة إيه ياراجل.. اللي يسمعك كده يقول ياما هنا وياما هناك... ده انت ياراجل تلاجتنا باظت نزلت تشتري لنا تلج من الجيران ...
نسيت لما كنت عايز تسرق الديك اللي فوق السطوح، وأنا اللي نزلتك من فوق، وانت بتغني له: آه لو لعبت ياديك واتبدلت الأحوال.. وفضلت تبكي زي العيال وتقولي أنا مش عارف عملت كده إزاي...سامحيني ..أنا مش عارفني ...قاطعها فوزي: طيب استني بس يافوزية عايز أقولك حاجة .. هو البانيه بكام دلوقتي؟ علا صوت فوزية : ياراجل اتخمد بقا مش كفاية عملتك السوده بتاعة المكرونة .. مكرونة يافوزي من غير بانيه ..هو انت لامنك ولا كفاية شرك ..جايب للعيال بيض وطعمية وتقولي اعملي عجة مع المكرونة..نظر إليها حزينا: بقولك إيه يافوزية البانيه خلاص.. كان حلم وراح فردت فوزية: لا ياخويا لو بطلنا نحلم نموت حتي الحلم هتموته يافوزي.. يافوزية حرام عليكي.. العيال لسه صغيرين مش هيعرفوا إن دي عجة يامفترية ..أنا قلت لك حمريها حبتين..وهي هتبقي مقرمشة ..بس انت فاشلة ياست فوزية وكمان مفترية.. ثم قال متأثرا: أنا لو كان بإيدي يافوزية كنت اشتريت نص كيلو بانيه ..هو أنا عمري يا أم أحمد بخلت عليكم بحاجة ..امتلأت عين فوزية شرا: ياراجل اتكسف على دمك.. أنا شكلي هطلب لك أمي هي اللي هتعرف شغلها معاك يابتاع بانيه الطعمية انت ثوان معدودة ..وقامت الست فوزية بالاتصال بأمها صارخة : الحقيني ياماما ..فقام فوزي مفزوعا استني يافوزية حرام عليكي ليه النكد ده.. أيوه يابنتي قالت أم فوزية يانهار اسود سلامتك يابنتي من أكل الطعمية هو جوزك ده فقران بيأكلكوا مكرونة بالطعمية.. بقولك إيه يافوزية ؟؟ نعم ياماما ..انت يابنتي تلمي هدومك وتيجي عندي حالا.. وأنا لي كلام تاني مع أبوكي لما يرجع في الفجرية.. وحاول فوزي إثناء فوزية عن الرحيل: عيب يافوزية تسيبي البيت عشان شوية مكرونة وطعمية..فقالت فوزية غاضبة: هو انت فاكرني إيه مليش أهل ياسي فوزى ولا إيه..شوف بتكلم مين.. ورحلت فوزية غاضبة مكفهرة، وبالطبع نزل فوزي لتوصيلها، بعدما فشلت طرق التواصل بينهما، وانقطع ماكان يصل بينهما من شات وماسنجر، وفي مدخل الحارة كان المعلم طلبة أبو فوزية لتوه عائدا..أهلا يافوزي يابني وناظرا لفوزية: إزيك يافوزية يابنتي.. إيه اللي جايبكم متأخر كده ... عنك ياعمي أشيل الشنطة قالها فوزي فرد المعلم طلبة : لا يابني دي مش تقيلة.. أصل خالتك أم فوزية قالت لي هات معاك العشا نفسها أوي في البانيه .. بس جبتلها سندوتشات طعمية عشان يبقي عشا خفيف!!!!
osmanaiman@yahoo.com
لمزيد من مقالات أيمن عثمان