أغلى تاريخ...القصيدة التى ألقاها الشاعر الكبير جمال بخيت أمام الرئيس أمس

إنسان ف بحر الزمن
عاشق كما الدراويش
أبوس إيدين الوطن
ولغيره ماباغنيش
لو أملى بين النجوم
اليأس ما يطولنيش
اصبر لحد الزمن
مايقوللى : ياإنسان
عايز تعيش الحياة
تعالى مصر .. وعيش

...
انا ومصر أصحاب
وتالتنا كان الزمن
هنا عرف ذاته
وحس بساعاته
من قبل ما الأرض تعرف
يعنى ايه أوطان
من قبل حتى الدفا
مايلاعب الأحضان
كان الزمن حيران
ماشى ف كون بردان
غرقان مالوهش ايدين
ف محيط بلا شطآن
المصرى مد ايديه
من غرقته ينشله
احنا اللى هانشكله

سنة وثانية ويوم
اسبوع .. دقيقة .. شهر
احنا اللى رح نظبطه
على ساقية جوه النهر
كان الزمن ماشي
ولاحد حاسس بيه
ولا هو دارى بحد
لحد ما جه هنا
وبقى سنين تتعد
موسم حصاد ممتد
موجة حضارة عفية
بتعلا فوق المد
من يومها ظهر الشيطان
حاقد .. حسود .. طمعان
ف كل مرة بإسم
وف كل مرة بشكل
هكسوسى مرة .. ومرة صهيوني
ومرة صاحب غشاوة
سارحة على عيوني
...
يامصر لازم دراعك .. يعدل الموازين
يامصر لازم شعاعك .. يبقى له حصن حصين
جيش انتصار الكرامة .. على حدودنا أمين
من حرب قادش سهامه .. تنصرنا يوم حطين
من عهد مينا وأحمس
وعرابى جد جمال
من حور محب العظيم ولآخر السلسال
...
- سكت الشيطان ؟!
- ما سكتش
جه بالظلام اشكال
الاحتلال المُر .. والغل والأهوال
فى خمسة يونيه ..
الغدر
أصعب من الزلزال
بكت يوميها الجبال .. وبكى الشهيد ف القبر
والتار وقف ع القنال .. لابس قناع الصبر
...
المصرى أول حبيب
للدنيا .. يعشقها
المصرى أول حروف
الدنيا تنطقها
أول صديق للزمن
الخضرة تتمدله
والصبر .. حكمة
تجيب الحلم من أوله
وبالدموع والفرح
اسم الوطن ..
تغزله
القهر .. هانبدّله
الظلم لو ينتشر
بالعدل .. هانعدّله
لو العدو كان جبل
احنا اللى ح نزلزله
لو العدو إعصار
بايدينا ح نسلسله


لو كان عدوى شبح
دم الشهيد .. يقتله ..
...
قصص البطولة ياشعب
اللى ابتدت بينا
لو حتى يوم اختفت
رح تتولد فينا
دخلت خلايا القلب وسكنت الوجدان
ولسه نورها بيسعى فى دروب سينا
الصبر مش تفريط ولا استسلام
ولانص نومة ذليلة على فرشة الايام
ولا ليل هزيل منطفي
بيجرجر الاعوام
الصبر .. غَزْل
وجد قادر ينتصر ع الهزل
بين الجموع
ولاّ وحيد .. ف العزل
تقدر تكون بالصبر
أغلى تاريخ
تقدر تكون بنّا
بيبنى حائط الصواريخ
تقدر تكون بالصبر
ياابن البلد ياخفيف
اتقل من النووي
على جدار بارليف
...
اتنين وخمسة
قابلنى يا ستة اكتوبر


اتنين وخمسة
ف عز الضهر يارمضان
مافيش قصادك يامصر
عدو لايقهر
ولافيش لجيشك موانع
لما يكون غضبان
الصاعقة عارفة الطريق
ومدرعاتى طوفان
ف الجو نسر الزمن
بيعظم الطيران
ف البحر .. وحش البحار
طوربيد .. سعيد بالموت
اضرب بأمر القيادة
وبأمر م القرآن
...
فرحك ياسينا النهاردة
مدى الإيدين تنباس
قومى وحسى بعشقى
من شهقة الأنفاس
حجرك ياسينا بينطق
يشاورلى ع الاعداء
بحر الرمال بيقابلني
فيضان من الاحساس

فرحك ياسينا النهاردة .. اتذكرى «شدوان »
اتذكرى « كبريت» .. والنصر ع الطغيان
افتكرى «راس العش» .. والمجد للانسان
حيى رجال الرفاعى .. صياد ولاد الافاعي

قومى اسمعينى باكبرّ
ودمى .. للميدان
وقلبى للمعركة
ودراعى .. للبنيان

إنسان ف بحر الزمن
عاشق كما الدراويش
أبوس إيدين الوطن
ولغيره ماباغنيش
لو أملى بين النجوم
اليأس ما يطولنيش
اصبر لحد الزمن
مايقوللى : ياإنسان
عايز تعيش الحياة
تعالى مصر .. وعيش