الصندوق الأسود

جوه كل واحد فينا صندوق أسود كبير هو نفسه بيخاف يقرب منه مليان إحباطات وذكريات حصلت من سنين، يا ترى مين فينا جرب يفرغ صندوقه ويكسر مخاوفه، مين جرب يسامح ويغفرغلطات، مين جرب يرفع ايده ويصلي ويطلب من ربنا يساعده فى مواجهته مع نفسه عشان ينام مرتاح.
وبعد قراءات كتير اكتشفت أن فتح الصندوق الاسود الشخصي يساعدنا نفسيا فى التخلص من عبئ كبير لان عادة يفتح مع شخص واحد لا اكثر و هذا الشخص بيكون مصدر الراحه والثقه ليك .
مثلا في العلاج المتبع للتخلص من الأدمان و المعروف بعلاج ال12 خطوة هناك الخطوة الرابعه و ديه بيكون فيها على المتعالج انه يفتح صندوقه الاسود كله و يفرغه على الورق و الخطوة الخامسة يناقشه مع مشرفه اللي هو مصدر ثقته و أمانه فى مرحلة التعافي و الهدف من مناقشتها انه هو لوحده بيكون فاكر أنه بيعمل كدة و أنه مش متربي مثلا و مفيش أمل فيه المناقشة بتخليه يعرف ان الحياه مليانة احباطات و ان مشرفه نفسة كان ف يوم فى نفس مكانة و عمل زيه فبالتالي يخف الضغط من عليه و يتعلم من كل موقف و يعرف أيه العيوب الموجودة في شخصيته, الخطوة السادسة و السابعة يشتغل على العيوب دية و يطلب من ربنا يخلصه منها و يبدء يشتغل عليها بتنمية المبادئ جواه.
و بعد ما قريت كتير جدا فى الموضوع ده عشان افهم و اعرف وصلت لتحليل مهم كل واحد فينا فيه 3 مناطق في شخصيته هنشبهم بأوض البيت لتقريب الفكرة ببساطة.
1-الصالون المدهب الفرنساوي:دايما الأوضه متلمعه ومستعده لاستقبال الضيوف علشان ياخدوا عننا فكرة حلوة,انت نفسك بتكون فيها لابس كويس وواخد بالك من تصرفاتك و شكلك قدام الناس,,هي ديه المساحه العامه اللي بتتعامل فيها مع الآخرين من خلال الواجهه المنمقه اللي الناس بتعرفها عنك,لكن محدش يعرف حاجة عن كراكيبك جوه باقي الأوض.
2-الليفنج(غرفة المعيشة)المنطقه اللي بنكون فيها على راحتنا تماما,لابس بيجاما,بتآكل بإيدك,قاعد مربع,حواليك كركبه مش مشكله مفيش حد غريب,الأوضه دية بنسمح للناس القريبيين مننا يدخلوها معانا زي العيله و اصحابك القريبيين اوي,ساعات نوضبها و ساعات نهملها ,المساحه الخاصة ديه اللي بنهرب فيها من دوشة الصالون علشان نبقى على راحتنا.
3-الأوضه الضلمة: أو الصندوق الأسود المقفول بقفل قديم محدش بيدخل الأوضة ديه خالص و لا يعرف حاجة عن الصندوق ده,محدش يقدر يدخلها غيرك و لوحدك تماما,,اللي يتشجع و يفتح صندوقه هيكتشف كنوز مخفيه مكنش يعرف انها موجودة او عارف و ناسي,و هتلاقي بردو كراكيب قديمه عاوزة تترمي من ذاكرتك عشان توسع لحاجات تانية أهم,هتلاقي ذكريات طفوله و مراهقه هتخليك تطير من الفرح,وذكريات تانية تخليك تعيط و ترتجف,هتلاقى مرايه عمرها من عمرك هتخاف تبص فيها لانها هتوريك نفسك على حقيقتها من غير رتوش,هتشوف مخاوفك و عيوبك و نقط ضعفك و إخفاقاتك و دوافعك بوضوح مؤلم أحيانا.
لازم كل واحد فينا لو عايز يبقى متزن نفسيا يتشجع و يفتح صندوقه الأسود و يدور على المرايه و يبص لنفسه فيها المرايه اللي فى الأوضه الضلمه اللي جوها الصندوق الأسود.
طول ما أنت خايف تبص في المرايه مش هتبقى عارف انت عاوز إيه؟مش هتعرف أيه اللي بيسعدك و أيه اللي يتعسك,مش هتعرف تحب الشخص الصح و تبعد عن الناس الغلط.مش هتعرف قيمة نفسك من خلال نفسك (مش من رأي الناس فيك)لازم تآخد وقت لنفسك لوحدك و تدعبس براحتك.
خد حبوب الشجاعه و أفتح الصندوق و بص في المرايه .
Shoroukayad@gmail.com
لمزيد من مقالات شروق عياد