رسالة الى الطبيب الذى سيفتح قلب جمال الغيطانى فى 14 اغسطس

رسالة إلى الجراح الذى سيفتح قلب جمال الغيطانى فى 14 أغسطس
أمانة عليك يا طبيب
وانت بتفتح قلب جمال
تبقى تبص على يمينك وعلى شمالك
واما تلاقى بلدنا بحالها هناك
إوعاك ياطبيب تلمسها بمشرط أو جفت
إياك يا طبيب توضعها على الترابيزة
امانة عليك ياطبيب
وانت بتاخد من قلب جمال نقطة دم
حللها الأول من كلمة مصر
خلى النقطة تروح مطرح مطروح براحتها
وتسيح ع الأرض السيراميك
بس امسك كلمة مصر بايدك
أمانة عليك يا طبيب
حلفتك بعيالك
والنبى لترجع لجمال كلمة مصر
واياك يا طبيب
تلمس كلمة مصر
بمشرط أو جفت
أمانة عليك يا طبيب
لما تلاقى اربع حجرات فى القلب
أوعى تحوش باديك اتنين وتقوله
ما كفاية عليك اتنين ---- لأ
أصلك مش عارف يا طبيب
إيه فى الاربع حجرات دول
بس أنا عارف
زى ما كل الناس ف بلدنا بتعرف
أقولك؟
ولابلاش تعرف
لما تحس أنك عايز تعرف --- قوللى
ساعتها
هقوللك واحكيلك
الاربع حجرات يا طبيب
مش حجرات شرايين ولا دم
زى اللى انت اتعلمته ف كلية طبك ---- لأ
دى الأوضة الأولى ف قلب جمال
ساكن فيها وطنا العربى بحاله
عرفت مهمة ازاى الأوضة الأولى
أمانه عليك يا طبيب لتسيبها ف حالها
وبلاش إنك تجرحها بنظرة بعينك
وبلاش المشرط يلمسها
والأوضه التانية فى قلب جمال
سَكِن فيها الأدبا بتوع مصر
لما تحب تشيلها ----
أقولك
جرب كده وانت تشوف
هات ملايين وياك
بس بجد
انا خفت عليك م التجريب فى الأوضة التانية
صدقنى
وحياة بنتى شهد اللى انت متعرفهاش
أصعب أوضة الأوضة التانية
اما الأوضة التالتة يا سيدى ف قلب جمال
فدى حتة أوضة
التالتة وانت متعرفش التالتة ف مصر
التالتة ف مصر يا سيدنا البيه معناها
مش زى ما بيقولوا انها تابته
التالته ف قلب جمال
نبته منبته نبابيت
بتخبط على كل اللى بيوجع راسنا بعولمته وقضاياه الفارغة
عشان يتحكم ف مصيرالخلق
والأوضه الرابعه
مِخَزِن فيها جمايله اللى مغطيانى
من ساسى لراسى
عرفت ايه معنى الأوض فى قلب جمال يا طبيب ؟
لا هى بطينين ولا أذنين
مش حجرات شرايين ولا دم
زى اللى انت اتعلمته ف كلية طبك ---- لأ
أحمد القشيرى
أمين تنظيم الحزب بالمنيا
محرر الصفحة الأدبية بجريدة الصاعد ورابطها
http:|| gabrealsaed.own0.