دولة أم جمال

مرحبا بك عزيزى الزائر فى دولة ام جمال وام عيلاء, وابو قردان عدو الفلاح بداية اول ما تطأ قدماك الدولة هتلاقى على شمالك مليون مطب صناعى صناعة حكومة دولة ام جمال محتاجين طيارة اف 16 تعديهم وعلى يمينك ايشى كوراث ومصايب ,وبلاوى بكل الأشكال و الألوان الغامقة
وفى النص بقى منحنيات خطيره جدا بقالها تلاتين سنه بالانحناء الخطر ده وكل يوم نصحى الصبح على الريق كده نسمع صباح الخير يا مصر انتى فى حالك واحنا فى حالنا وشد الحزام يا شعب علشان المنحنيات الخطر تتعدل وتستقيم ونتخلص من خطورتها قمنا شدينا وربطنا لحد ما تقطعت اوصالنا والمنحنيات لسه خطر أتارى المنحنيات مش خطر لكن ابو قردان وزملائه كل يوم بعد ما ننام ينزلوا يزودها انحناءات على انحناءاتها واحنا يا نايمين يا صاحيين ومغمضين و ساعات صاحيين ومش مغمضين بس ساكتين , بعد المطبات والكوارث والمنحنيات فى دولة ام جمال هتلاقى جمال بذات نفسه واقف حاطط صوابعه فى عينيك فى كشك الحزب الوطنى بيقولك من اجلك انت يا حلاوه هبقى وريث ولانك اتعودت على الخطر وساكت على الخطر قاعد لك احسن يوحشك الخطر دا انا جمال اللى بخوف العيال ,بالنسبه لابو قردان اللى ماسك السلطة بطمنكوا عليه لسه سمعاه من يومين بيقول لعمكوا كلين لو جيتوا طلبتوا مد مهلة المقطورات تانى فى 2012 مش هوافق على فكره لانى سامع ان ناس كتير بتموت من حوادثها على الطرق ,,,,الحمد لله على ان ابو قردان لسه بيسمع والعبره من كلامه انه باقى لاخر نفس وطالما عزرائيل مزرهوش فقاعد كابس على مرواحنا والمنحنيات هتزداد التواء وهتبقى دوائر مفرغه نلعب بيها هيلا هوب وتفضل محوطانا كده لو مكسرنهاش ,نيجى للست ام جمال مؤسسة دولة ام جمال واللى هى مبتكرة فكرة التوريث وايضا متسببه فى استمرار اسماء وزراء افسد من الفساد فى الوزارات ,وابو قردان ميحبش يكسر لحكومته كلمه ,ام جمال تقوله عين سليمان وزير اسكان يقولها اؤمرى طيب اديله وسام يقولها اوامرك هو انا ليا بركه الا انتى يا ام جمال وكله على دماغ شعب الدولة التمليك بس للحق ام جمال دماغها بمقام ادمغة خمسين بقره فريزيان يعنى مثلا عملت مهرجان القراءة للجميع ونصف الشعب امى مع انها لو كانت عملت مهرجان الفته للجميع كان بقى اوقع وانفع وانجح ومتماشى مع سيستم الدولة الملك ,عزيزى الزائر عليك ان تتخيل ما هى شكل دولتنا المحكومة بعقلية الابقار ويديرها من الباطن مجموعة من الثعالب والذئاب وحرامية الغسيل ويعيش شعبها الاصلى كزائر غريب لطيف ,ظريف ودمه خفيف لا كلمه ولا موقف بس للامانه العلميه يمتلك صوتا واطى ورقيق مع النظام عالى واجش مع اخوانه من المواطنين الزائرين الغرباء فى دولة ام جمال التمليك ,عزيزى الزائر الغريب ان كنت ترغب فى وطن تكن به مواطن حقيقى فانضم الينا فى عالم التغيير