حماتى و توفيق عكاشة و الجيل الرابع من الحروب

وقفت بسيارتى فى المكان المتفق عليه و لمحت صديقى ياتى مسرعا فى موعده تماما ثم دلف داخل السيارة و على وجهه علامات القلق و التوتر , سالته عن سر توتره فاجاب : بعدين , بعدين , اطلع بسرعة
قلت : اطلع على فين ؟
قال : مبنى المخابرات العامة
صرخت : بتقول فين ؟
قال : ايه ماسمعتش ؟
قلت : لأ سمعت , بس احب افهم
قال : انا حاقدم بلاغ فى حماتى
قلت : ليه ؟ طلعت جاسوسة
قال : العن , دى طلعت طابور خامس
قلت و قد تملكنى الفضول و حبست ضحكاتى حتى لا احرج صديقى : طابور خامس ازاى يعنى ؟
قال كمن يقدم ادلة دامغة : انت عارف ان حماتى عايشة معانا من يوم ما اتجوزت بحجة انها بتحب بنتها اللى هى مراتى ومش قادرة على بعدها
قلت: شىء طبيعى , مش بنتها الوحيدة
قال : الموضع طلع غير كدة , الهانم حماتى بتتعمد تنكد عليا كل يوم لدرجة ان اعصابى تعبت و بدأت ارتكب اخطاء فى شغلى و انت عارف شغلى حساس قد ايه ( صديقى يعمل مسؤل فى احد مطابخ الفنادق الكبرى ) و النهاردة ارتكبت خطأ كبير احتمال يخرب بيت الفندق اللى باشتغل فيه , و دة طبعا ممكن يسىء لسمعة السياحة و يضرب اقتصاد البلد فى مقتل , باختصار انا تأكدت ان حماتى اداة من ادوات الجيل الرابع من الحروب ,,,, اطلع , اطلع على المخابرات , خلينا ننضف البلد من الاشكال دى .

انطلقت بسيارتى الى اقرب مقهى حتى يهدأ صديقى و ضحكت فى سرى و قلت ( سامحك الله يادكتور توفيق يا عكاشة , حولت الناس كلها لطابور خامس )

لمزيد من مقالات وسام أبوالعطا