نبض الناس

الحرية: أرجوزة الأطفال للكبار

د.ىحىى الرخاوى
كتبت هذه الأراجيز للأطفال، وحين أعدت قراءاتها مؤخرا وسط هذه الشعارات الزائطة في أسواق ومزادات الحرية، وهم يصدرونها إلينا سابقة التجهيز، ويعايرون كل من »لا يسمع الكلام« بأنه »قليل الحرية« (وقليل الأدب بالمرة) أقول حين رحت أتأمل »حرية« أغلب من يبيع لنا الحرية أو حتي ينادي بها عندنا، أو يزعم وجودها، تساءلت هل هؤلاء جميعاً يعرفون الحرية كما قدمتها للأطفال، وإذا بي أكتشف أنني تقمصت الأطفال بدلا من أن أرشدهم وأشرح لهم، وإذا بالأطفال يكشفوننا نحن الكبار، كل ما أرجوه من السادة الكبار أن يطلقوا سراح أطفالهم بداخلهم إن لم يكونوا قد نفذوا فيهم حكم الإعدام بعد، ويغنوا هذه الأرجوزة لا يقرأونها فقط.
-1-
بيقولوا كلام مالهوش لازمة
باين أهالينا ما هيش فاهمة
قال »حرية« !؟.... أُسْكُت لاغْلط.
بتهرّج واللا بتِسْتَعْبَطْ !
هوا انت يا عمّنا أصلاً حرّ
دي الحنفيّة عمّالة بتخُرْ
أفكار جاهزة، فتوي وأحكام،
واللي ينهّق ركّبْ له لْجام !!!
-2-
»تتحرك جوّه اللي قلناه وانْ كان عاجبكْ، !!
وساعتها تبقي حر تمام، كدا علي قدّك«!!!
دي حكاية وباين مش نافعة
دانا زي باخطِّي فْ نار والعة
-3-
الحرية ما تجيش أبدا كِدَا مالآخرْ،
ولا كلّ ما اقرّب تتَّاخرْ
بصراحة أنا خايف أبقي حر.
أصل انا ما اعْرَفشي »أسيبها تمُرّ«
حا تمرِّي ازاي وتروحِي علي فين،... وانا مش داري
أصل انا باستعبطْ، وبَدَارِي
مش عايزْ أكتفي بشعارها
ولا عُدت ارتوي من أشعارها
مش أحسن نعرف »نعمل إيه«
راح تستغرب ما اللي عملته وقدرت عليه!!
-4-
الحرية هي »الحركة« جوّاكْ برّاكْ،
هي إنك تقدر تتغيرْ من »هنا« »لهناك«،
و»هناك» مفتوح وبيتفجَّرْ
كل ما توصلّه يتغيَّرْ
إوعي تصدقهم: تستنَّي «لحد ما تكبر»
دا انت تراجع أوِّل باوِّل: كلّ كلامهمْ
راح تلقي حاجات مش علي بالهم، غصبنْ عنهم
وتفكر »بالعقل« وبرضه بحاجات «هيّه»،
ما انت عارفها، مش مستني مني وصية
-5-
الحرية انك تتحرك وتْراجعْ
«إنك تحترم اللي وصلّك!»، دا مافيش مانعْ
.... بس يا خويا يبقي بدايهْ، بسْ مش اكترْ
وتغامر تحمِلْهَا أمانة، مش تتمنظرْ
-6-
الحريهْ: انك تقدر ترمي طوبِتهّا
لو مش قادر، تدفع «حالا»: حقّ قيمتها
لو مش قادر انك تحمل إلا خيبتها
بس تاخدْ بالك، مش يمكن: تستحلاها؟
مهما كات غاليه، إوعي تقول »ياللاّ...،بَلاهَا«!
-7-
الحرية عمرها ما تكون وانت لوحدك
الحر صحيح لازم يبقي كده وسط الناس
مش يقعد يلعب مع نفسه من غير إحساس
تبدا بنفسك واللي حواليك يعملوا زيك
لو حر لوحدك مش نافعة وحياة والدك
-8-
الحر عليه يسأل تفسه: حر مع مين؟ حر علي مين؟
حُرّ؟! سارقها ورايح علي فين؟
ما انا برضه حر: بقينا اتنين !!!!
لو حر صحيح؟ بقي تستحمل حواليك أحرار
يعني يختاروا ما دام إنت برضه بتختار
الحر الحر يلاقي دايما أحرار حواليه
ماذا وإلا:
يبقي فْ زنزانة الحرية وْمقفولة عليه