حوار مع صديقى الإخوانى

☚وعلى فكره أنا مش إخوان
☚بس أدوله فرصه كمان
☚عشان النهضة تجيب مفعولها
☚فاضل تكه ويطرح فولها
☝ يانهار أبيض مش معقول!!!
☝ هيه النهى دى زرعة فول ؟!!
☚ابدأ ابدأ
☚ مين كان قال
☚ومين قال كان
☚ أصل النهضة دى كون وحياه
☚وكبار وعيال و مكان وزمان
☚والراكب راح يمشى أكيد
☚والنايم ده مسيره يقوم
☝ اهدى شويه يا عم علينا
☝ كل كلامك مش مفهوم
☝ ايوه ..يعنى النهضة دى إيه؟؟؟!
☝ بالراحه علينا وفهمنا
☝ لو تقدر بشويش اقنعنا
☚النهضة...مممممم
☚طب يا سيدى هبسطهلكو
☚علشان الفاشلين أمثالكو
☚بس عالله تفهموا حاجه
☚أحسن والنعمة هضلمهلكو
☚بص يا بابا...............
☚النهضة ده طائر له جناحين
☚وراس كبيرة ورجلين
☚هياخد نا معاه فوق ويطير
☚وهيخلينا أغنى من الصين
☚وهيبقى جوانا ضمير
☚مالآخر يعنى حاجة جنان
☚وعلى فكره أنا مش إخوان
☝مافهمتش حاجة بس خلاص
☝ اش جاب النهضة لجناح وراس ؟
☝ يعنى بلدنا راحة ل فين؟
☝يعنى أنتوا مش ماشيين؟
☝طب هيه حرام المزيكا؟
☝طب يبقى القرض برضو حرام!!!
☝طب مين موت جيكا؟؟؟
☝طب مين موت اسلام؟؟؟
☝طب فين هوه الإسلام...!!
☚كافر ليبرالى علمانى
☚لازم تتمسكوا بلجام
☚بصين تحت رجليكوا
☚مش بتبصوا لقدام
☚عايز تعرف مين موتهم
☚أسألهم ليه نزلوا من بيتهم
☚إيه وداهم هما هناك
☚ومعاهم نستو ولانشون إخوان
☚وعلى فكره أنا مش إخوان
☝ طب معرفتش مين مسئول
☝ دم حسينى فرقبة مين
☝ودم الجندى المجهول
☝دول وصلوا ييجى متين
☝طب ده ذنبه انه اتظاهر
☝وانه مخفش وانه ما طاطا
☝والواد عمر الطفل الطاهر
☝ده سلاحه ياعينى صميت وبطاطا
☝وغيره وغيره كمان وكمان
☝ايش قولك يا مش اخوان
☚عقولكم باظت م الإعلام
☚سيبك منهم يابنى ونام
☚ واطفى النور والتلفزيون
☚ دول كهنه وسحرة فرعون
☚ واحلم ويانا بالانتخابات
☚ وبشعب وشورى ومحليات
☚ والشركات والهيئات والنقابات
☚ بكره هننسى كل الأحزان
☚ والأيام السوده زمان
☚ وعلى فكره انا مش إخوان
☝ طب فاضل عندى بس سؤال
☝ قولى ازاى هيكون الحال
☝ يعنى بكره هنلاقى قوتنا
☝ هنلاقى زيت عند البقال
☝ والنور هينور فبيوتنا
☝ ولا ده حلم صعب محال
☝ طب حد هيسمع صوتنا
☝ ولا هتحطوا الأقفال
☝ طب حد هيمشى ف موتنا
☝ طب أنت شايفنى إنسان؟!!
☝ جاوبنى يا عم الإخوان
☚صوتك يابنى طبعا حر
☚ لكن صوتك بردضه أمانه
☚ لو كان لينا دى حاجه تسُر
☚ وان مش لينا تبقى خيانة
☚ أما الزيت موجود وال زاد
☚ ف زمان الخير وخير يا زمان
☚ وعلى فكره أنا مش إخوان
☝ بانت والله خلاص النية
☝ مش باقى عندى إلا وصيه
☝ مش ليكوا .. للأجيال الجاية
☝ إن مره تفكر تعمل ثوره
☝ إوعى تكرر نفس الغلطة
☝ تمشى الوقتى وترجع بكره
☝تلقى التعلب نط النطه
☝وسرق اللحمه ابن الحراميه
☝خليك واقف وب سلميه
☝ إن دامت قبله تبقى تدوم
☝طول مالحق معاك متخفش
☝ربك ناصر المظلوم
☝لو ببلاش مابنتعلمش
☝وتمن الحريه غالى اكيد
☝هندفع احنا تمن غلطتنا
☝ونعلم اولادنا من اول وجديد
☝ ان السكه لسه طويله
☝وغلطتنا اننا صدقنا
☝ان الثوره قلبه وشيله
☝ واتعشمنا فيوم وبليله
☝ نلقى بلدنا حلوه جميله
☝ راح اعلم ابنى عدم النسيان
☝ راح اعلم ابنى ما يبآش اخوان
☝وان قررت فيوم تتأخون
☝ اوعى تخاف وتبقى جبان
☝ اوعى فيوم يا حبيبى تعود
☝ وتقولى على فكره انا مش اخوان