ارحل وسيب الصولجان والتاج

الكلاب واقفين علي باب الملك
كل كلب يهز ديله
كل كلب مع دليله
صُره م الكدب العتيق بتداري ليله
واللي كاشفه صمود نخيله
الضلال واخد طريقه للنهاية
والحدادي استعمرت كل الشجر
والورق أصبح وشاية
والغلابه صبرهم في البلوه آيه
جاعوا غنوا
وكل عشق مع قتيله
والصبر مش مرهم في لفة شاش
الصبر للمجروح خليله
العشق منه والورود وبساتين المحبه
والجنون والكرامه وجناح الطيور والحنان
والعزيق في الأرض والثوره علي الليل كان
والجبال اللي انحنت وكل صبر وله سبيله
والملك ابن الملك
ما فضلش منه غير حكايه
حكاها عفريت السرايه
وكان وكان
اسمع معايا واعرف الليل الجبان
غابه وراعيها القهر وجبال الهوان
سنين بتمشي وفايته جنب الحيط تراب
والكلاب لسه كلاب
متاريس ورا متاريس ورا متاريس
والليل بقي كل شئ
اللص والسجان
رقص المهرج والمغني الألعبان
أبو دقن عيره الناعم الأهوج سليل الجبن
الجاهل رديف الخسيس
وما فيش إجابه للسؤال
والليل جِمَال باركه في صحرا الروح
إمتي وفين ؟
والسؤال دافي ودفين
والحمل يترجرج علي الكتفين
طلعت زهور بيضا وبجرحها عارفه
داسوها بلا رأفه
يا كدابين الصدق شل الكدب في الزفه
والكلاب بتعبي في القفه
طلعت جبال الوهم سافه
نزلت لبير الجهل سافه
طلعت زهور بيضا وصوتها عفي
طلعت زهور بيضا وصوتها أنين
تضرب علي الكفين
عارفه الوجع وفين بدايته ومَسْكنه
والجرح مين ها يسكِّنه
الوقت ابني وبنتي والدموع في العين
طلعت زهور البلد أفواج مع أفواج
ارحل وسيب الصولجان والتاج
والحجر تحت السما غنَّي بجلال
ولا شئ محال
لما الطيور تعزف برفرفة الجناح
تمسح رفيف الحسره بالهفهفه
وترجَّع الأرض البراح
صوتي بيعرف اسمه أول مره
حالف يزيح الضلمه م الجلاليب
بالرفرفه الفجر صاحي وعايق
وكأن صوتنا بيبتدي أول صباح
والنهار بقي كل شئ
إيد في إيد بتغني في أول طريق
أعلام .. رايات .. ولاد .. بنات
دموع فرح وحزن أطرش والهوي فرحان
ومصر بلت تمرها
بعد أما بلعت مرها خمسين سنه
والورد صاحي الصبح بيلملم جراحه
والملك حبة ضلام راحوا
والعشق فيه فصل الخطاب
ولا عزاء للملك ... كل الملوك
ولا عزاء للكلاب .. كل الكلاب