الهلفوت

إلي ضحايا »السلام 98

مابيموتشي غير اللي يموت
وموت يا حمار.. مادمت حمار
بتستني النهار ف نهار..
وأنهار الدموع غابة.. غلابة بس دايقنهم
مضايقنهم ولاد الكلب وب ضيقهم
تزيد وتزيد ملايينهم
مادام صنفك من الهلافيت
تاكلها بدقة.. والا بزيت.. تعيش راضي
لا قاضي.. كنت ف يوم
ولا جيت كما فارس من الحواديت
لا ماضي ليك ولا حاضر
ولا فاضي تبص لحد برا عنيك
يا هلفوت م البشر ايه تكون
وايه تمنك حدا المماليك
رغيف طازة.. وطله من ورا الشبابيك.. علي جنازتك
وغير مسموح ترافق جتتك للقبر
يا عنوان السماح والصبر
واديني معاك.. وآخر م انقطع نفسي
لقيت نفسي طريد داري
ومتداري ف عفريتي
وزار عفريتي مش حامي
وحامي جزيرتي مش حامي
وحامي قرن م الفلفل
وفلفل ياللي قال بتحس
حس الواد ماهوش طالع
دا طالع لجل يسترزق
ويتكلم فيستذوق
ويتزوق عشان فرحه.. اللي منصوبله ماحضروشي
مادريوشي الكلاب الا ما روحه عند من خلقه.. بتصرخله
وتطبخله اللي مختارها وتستني
ما يستني القدر دوره
ومن زوره اللسان مسحوب
لا متكلم ولا بيتوب
يتوب الشر عن شره
وما يتوبشي اللي مكتوبشي يتوب تاني
وبيعاني البشر منه
مع انه صغير السن يا سنه
وباسنه القلم يصرخ ألم عنه
ويا اسفاه يا عفريتي
ماباموتشييييييييييييي