قصائد

القصّه وما فيها
كل ليل
علي حجر السما قمر
وكام نجمه شاهدين علي حسنه
كلّمته
وأما نطق
كلمني عن حزنه
والغنا لما بكي ف القلب
وانتحب سألته ليه ..
سألني ليه ونس اليتامي تعب ؟
والعمر قنديل انطفي صحبة هواه
ولا فيه حياه ..
ولا فيها روح ..
ولا فيها ..
- مطوّلش عليكم -
القصه ومافيها ..
كان ليل وكان قمر
وأنا خدت معاه وإدّيت ف كلام ..
عن بكره وعن بعده
والطيبين اللي اتواعدوا
ولحد النهارده ماجوش
العيش ، والعيشه
واللي عايشينها
وبنت ماشيه ف مشاكلها
شنكلها غرام / وقعت ..
من أول نظره وأول كلمة حب ..
قالت نعيش
والليل بيجري علي حصانه
عنتر زمانه
ومابيدّيش
وتوته . توته
ه نكمل بكره الحدوته ..
- بس مااكدبش عليكم
ده مجرد حلم
والأحلام ممكن ماتجيش.
هيه الحياه كده
زي نور شقي / زي روحك
زي عنيك ..
هيه الحياه كده
فتافيت أحلام علي كام وجع
وفرح وحيد
زي حلمك / زي قلبك
زيّها ..
البنت اللي بتطلع ..
علي شجر الليل ف عنيك
وتقطفلك ..
من كل ماتشتهي حواديت ..
مافتش عليها حزين بسلام
ولا ميّل هواها ف يوم
لغريب ..
زي حزنك / زي دمعك
زي ليل ..
واقف مابينا ف الهوي
وكل مانقرب / يشد
تتبدل حلاوتها بمر ف عنينا
نتوه
مانلقاش بعض
نرتجل أشياء كتير مانفهمهاش
بين الحقيقه والإندهاش
هيه الحياه كده .
كرتون
لما السنين تنهار
والحلم يصبح أثر ..
ف عنيك .. يرحل قمر
ويموت
تتكتف بالآهه بيوت ..
حضنك الدافي / روحك العاليه ،
إحساسك الناضج ،
قنديلك السهران ليلاتي ع العتب ..
يواسيك
يرميك ..
ليل إنتظارك للمدا / مشاوير ..
بتزغزغ حلمك المحبوس
بين العيش والغموس
وسنين بتوهب حزنها لك
مين بدّلك
صفصاف بيلعن نشأته ف الريح
مين علمك
ترقص وموّالك جريح ..
محزون
متعلق والحبل دايب
ف البلاد اللي مالت ع الخرايط ..
تشرب
والمطر كرتون.
ف شوارع قلبه الزحمه
بيفكر
ف شوارع قلبه الزحمه
ه يعدي إزاي
ومنين ؟
وعيون الناس متاريس لعنيه
ممنوع تشوف أو تلمس دفا ..
من أي زاويه وإتجاه
صعبه الحياه
وهو اللي كانت خطوته قد البراح
داقت عليه
ه يعدي إزاي
ومنين ؟
ومفيش قدامه غيرها
نهايه واحده للألم
وسكه واحده للعاشقين
ه يعدي
ويسيب لأحزانه الطريق
ويسيب لأحلامه نشوه خالصه
قدرت تشد من بكره الأمل
وتجيبه ..
ف حضنها الدافي الجميل
واللي أكيد
ه يروحله
من غير مايفكر.
حلم قاطع صوابعه
كل اللي باقي م الورد شُوكُه
كل اللي باقي م الشط شُوقُه ..
للي جرحهم هواك
وانت لسّه عايزني معاك ؟!
أتهجي حروف الليل ف غُناك ..
إحساس مقهور بكسور الضحكه
وضيق الحال
ده انا لسّه بفك خيوط الهم ع الموّال
نتصافي
ونصفي حساب أيام
عضتنا وسابت ..
جرح بطول عواميد النور
مدقوق
مرشوق ف القلب له عزوه ..
جايين حالفين لهواك ..
منعه
والوتر المشدود لغناك ..
قطعه
وأنا حلمي قاطع صوابعه / الخمسه
لا بيكتب ولا بيقرا
وبيترجّاك
لو لسّه عايزني / موّتني
وأنا آجي معاك.