حب محاسبين

حبيبتى افهمينى عدت سنين ورصيدك فقلبى لسه مدين
خانة الشوق مليها الحنين وخانة المحبة فوق عاليين
راجعى عليها تلاقينى واقف واحد صحيح لكن حزين
قيودك لا ترحل ولا تترحل خلتنى عايش عمرى سجين
حبيبتى افهمينى.. عدت سنين ورصيدك فقلبى لسه مدين
تايه يا روحى وأفكارى شارده بقول يا ترى فينها النهارده
طب هيا موافقه ولا معارضة ولا هتهرب وتعملها عارضه
قلبى يا روحى مستنى إمضا لجل ما يعدم دينه اللعين
حبيبتى إفهمينى. .عدت سنين ورصيدك فقلبى لسه مدين
تعالى حبيبتى نحسبها حسبه سهله وبسيطه لينا ومناسبه
تعالى ننسى اللى فات ده إحنا لا عقولنا دفتر ولا اله حاسبه
ونبدأ صفحه جديده وبيضا لا فيها حساب ولافيها محاسبه
لا اشاره سالبه ولا مطالبه نظبطها ولا نلاقيها قالبه
هنسبها عاللله وننسى اللى كان لا نعمل موازنه ولا نعمل ميزان
ميزانا قلوبنا. ..ورصيدنا القديم وحبة مشاعر فالقلوب باقيين
حبيبتى إفهمينى. ...عدت سنين ورصيدك فقلبى لسه مدين
جردك مفاجىء واهو احساسى هوه هوه نفس اللى كان
فوق الرفوف وتحت الكراسى تلاقيكى انتى ساكنه المكان
ولو دخلتى جوه ف راسى تلاقى الصوره زى زمان
بنوته حلوه ومتنرفزه وواد بيعشق فيها الجنون
البت اهية متجوزه والواد الله يكون فالعون
وكأِن الايام بتديله جِزا عايش ف وهم من الظنون
بين سين وجيم وجيم وسين ياعينى الواد صبح مسكين
حبيبتى إفهمينى.عدت سنين ورصيدك فقلبى لسه مدين
حبيبتى حبنا مالوش حسابات ولا فية مشقة ولا تكاليف
ماليه اعذار ولا اجزات ولا اقبل مكانى يكون ارشيف
عايزة تمشى مفيش اذونات عايزة تترقى اديكى تكليف
بدرجة عليا جوة قلبى تتثبتى وبكلمة منى وبامضتى. .تعيين
حبيبتى إفهمينى. ...عدت سنين رصيدك فقلبى لسه مدين
حبيبتى لازم نراعى الظروف حسابنا لا يمكن يكون موزون
يا إما نضرب ف الكشوف وندارى الحقيقه عن العيون
يا إما نسحب عالمكشوف يا إما نلعب فى المخزون
وتبيعى القديم فى مناقصه لانة خلاص قديم ودايب
وكده حساباتك هتبأة ناقصة حساب اسمه المصايب
ترمى فيه البلاوى القديمه وكل اللى مات وماله صاحب
اما انا. .. فدفاترى سليمه وهفضل احبك برغم المتاعب
معايير المحبه عندى عظيمه هصونها وهدفع للزمن الضرايب
حسابى الختامى. .حبيبتى سلامىوشوقى وحنينى لاجمل عينين
حبيبتى إفهمينى. ..عدت سنين ورصيدك فقلبى لسه مدين