الأستاذ اللى ورا أخد نهضة!

تبدأ الحكاية مع انتخابات 2005 وبداية معرفتى بالسياسة وكان كد على ما أتذكر أول ظهور حقيقى للإخوان فى عصر مبارك، وكانت الدعاية الانتخابية بتاعتهم عبارة عن عملية منظمة وممنهجة بحيث ينزل المرشحون الإخوان المنطقة قبل الصلاة بخمس دقايق ويتكلم طبعا عن إن الإسلام هو الحل، وإنهم جاءوا لإنقاذ البلاد وفجأة الأذان يأذن يروحوا يفرشوا الشارع ويصلوا بالمنطقة كلها وطبعاً أى حد قدام المنظر دة لازم يتحرك ويعطيهم صوته، ونجحوا بنسبه كبيرة فى الموضوع دة وأخدوا فى المجلس أكثر من 80 كرسى وإحنا ماخدناش منهم أى حاجة لحد 2010.
وكان طبعا عندهم مشروع شبه مشروع النهضه كدة لكن طبعا لا حياة لمن تنادى غير كام سوق خيرى وكام دورة رمضانية أهو بردوا دول معارضة، والنظام الفاسد مش بيخليهم يعروفوا يعملوا حاجة؟
ومع بداية 2011 وكانت بداية الثورة المصرية المستمرة حتى الآن أعلن الإخوان بعد سقوط المخلوع أنهم لن ولم يرشحوا أحدا للرئاسة المصرية فى هذه الدورة وأنهم سوف يكتفوا بالترشح على مقاعد مجلس الشعب بنسبة 50% على الأكثر ونزلوا للناس بمشروع وبرنامج انتخابى جميل جدا سوف يوفر مليون فرصة عمل خلال سنة وبرضه لم نرى أى شىء من هذا البرنامج سوى كام سوق خيرى وكام دورة كورة مش رمضانية "عقبال رمضان لما جه كان المجلس باى باى".
وبعد تغير المعطيات قرروا ينسوا كل حاجة ويرشحوا أحدهم للرئاسة وبصراحة كان هناك أكثر من واحد إخوانى نازلين الرئاسة أولهم خيرت الشاطر "مهندس مشروع النهضة"، والتانى عبد المنعم أبو الفتوح "على فكرة أنا مش إخوان" كان قد أعلن انشقاقه على الجماع وترشحه للرئاسة فى 2011 والتالت محمد مرسى "رئيس حزب الحرية والعدالة آنذاك" والرابع حازم صلاح أبو إسماعيل "مرشح الاخوان 2005 فى نقابة المحامين" والخامس عبد الله الأشعل "أول ما أعلنوه مرشحا رسمياً راح اتنازل لمحمد مرسى طب هو نزل ليه أساساً"
وطبعاً كل ما تسأل واحد من صحابك الإخوان هو انت مع مين يقولك أنا مع مشروع ومش مع شخص ودى كانت بداية ظهور مشروع النهضة.
معلومات اتقالت: مشروع النهضه تم إعداده فى نهاية التسعينات ويضم خبرة أكثر 160 دولة فى حل المشاكل وكلام كتير اوى ومنها ال 100 يوم إطفاء الحرائق والقضاء على المشكلات الخمسة.
وطبعا تعليقى على الكلام هو تعليق م خيرت الشاطر "مفيش مشروع نهضة والإعلام فهمنا غلط"، بس معنى كده انهم سرقوا الرئاسة علشان قالوا للناس حاجة انتخبتهم علشانها وفى الاخر الحاجة دى مش موجودة بس مش مهم .
لالالالالالالا على فكرة النهضة طلعت موجودة وطائر النهضة ما يزال يحلق فوق سماء مصر وإليكم الإثباتات:
لأول مرة فى التاريخ المحافظات تعلن استقلالها "الإسكندرية والمحلة وبورسعيد " حتى ولو على سبيل التهديد
لأول مرة الداخلية تنسحب وتقفل أقسام الشرطة بداعى إنه يتحمل أخطاء النهضة السياسية وحده.
لأول مرة فى التاريخ يقترح فكرة تأجير المناطق الاثرية "حتى وإن لن تنفذ لإرادة الشعب وليس إرادة الحاكم"
النهضة باينة أوى فى حوادث القطارات والطرق اللى كل يوم التى تجعل كل واحد قبل ما يركب أى مواصلة يكتب وصيته
باينة أوى فى العشوائية فى الاختيار التى تجعل د جلدية "ياسر على" رئيس مركز المعلومات بمجلس الوزراء وأول تقرير يطلعه "فاشل" بالمختصر المفيد.
باينة فى فى محاصرة المحكمة الدستورية وبعد كدة يقول انا بحترم قراراتها.
وفى قرارات غلط ياخد القرار الصبح، ويرجع فيه فى الليل
حاجات كتير جدا بس الظاهر كدة إن الشعب نظره ضعيف.
كلنا أخدنا نهضة بس يا ريت اللى اخد المرة دى مياخدش المرة الجاية علشان يسيب فرصه لأخوه.