عاوز أحس إنك أمى

ده إنتى نزلة فيا مرمطة... بيقولوا الأم حنينة، وأنتى ليه أسية كده فى كل حاجة .. بره وجوه مبهدلانى على الغريب حنينة وتبوسى أيديه وتميلى.. ليه بايعانى وفى عز البرد معريانى ولكلاب الشوارع رميانى.. ليه شيفانى وساكته ليه مش حاسة أنى يتيم مكسور، متغطى بأحلامى وحياتى كلها أوهام عايش فى ظلم وذل وبركع بردو وبابوس أيدك حسى شوية أنا فاض بيا ليه خليتى لحمى رخيص وسلمتينى لندل خسيس.
مش شيفانى يتيم مجروح عايش بس حلوة روح مستنى الرحمة منك مرة.. إزاى بيقولوا الجنة معاكى وأنا وياكى عايش وسط النار أضحكى مرة .. ده أنا لسة فى غربة امتى هاشوف النور بعنية كرباجك علم فيا.. نفسى أتكلم قبل ما أموت أنا مقهور وحزين مكسور حسى شويه أنا لية مطرود ما الجنة.. ده أنا بتمنى تحسى شويه أنا بردو ابنك ده الحمل كسرنى والفقر قهرنى.. بصى فى كل مكان هتلاقى الدم سال .. حسى شوية بالى بيحصل فيا بموت غرقان وأنا هربان وبموت بردو من إهمالك.
وعنف نظامك ليه دمى رخيص ؟؟ ده أنا عمرى ما كنت خسيس ليه قلبك أقسى من الحجر.. وأنا قلبى عليكى بينفطر أنا طول عمرى بضحى عشانك أمتى تحسى بيا شويه .. عاوز أحس أنك أمى.