مبارك سايب وراه رجالة

هو صحيح مبارك فى السجن، لكن سايب وراه رجالة، رجالته موجودون فى كل مكان، شغالين ليل نهار، يخربوا الثورة، وينتقموا من الشعب.
ساب وراه رجال أعمال نهبوا الشعب وسرقوا أراضيه، اتخمت ثرواتهم من المال الحرام، وأرصدتهم بالمليارات، ولسه ما شبعوش، عمالين يحاربوا عن مصالحهم ويدفعوا الملايين اللى عارفين إنهم هايعوضوها الضعف لما يرجعوا النظام الفاسد.
رجال أعمال بيدفعوا بسخاء للإعلام عشان يكذب، وللبلطجية عشان يخربوا ويتظاهروا ويقطعوا الطرق، ويقتلوا البشر بس عشان البلد ماتشوفش استقرار.
ساب وراه بلطجية مستعدين يعملوا أى حاجة، وكل حاجة بالتمن، حتى لو كان إزهاق أرواح وسكب دماء.
ساب وراه رجال شرطة وأمن دولة، اتعودوا يبقوا أسياد البلد، وعايزين يرجعوا تانى أسياد للبلد، حاطين أيديهم فى أيدى البلطجية، شغالين حرب ضد الشعب، اللى مفروض يحموه، لكنهم بيحاربوه.
ساب وراه حزب وطنى منحل، كان زمان كل حاجة بإيده، وصعبان عليه ينسحب البساط من تحت رجليه، لسه موجود فى مؤسسات الدولة، فى الوزارات والمحليات بيحكم من وراء الستار، معركتهم معركة حياة أو موت.
وأمريكا وإسرائيل من وراهم عاوزين عملاء ليهم يحكموا مصر.
عشان مصلحتهم مستعدين يضحوا بالشعب المصرى كله.
والله وعرفت تربى يا مبارك!!!!