حوار بين حرامية ثورة 25 يناير(أيّكشى تولع!!)..

بقلم علاء الغندور
يشترك الكثيرين فى محاولة سرقة ثورة 25 يناير سواء أكان عن قصد أو عن غير قصد
و إليكم هذا الحوار الذى يعبر عن حالات فرديه او جماعيه ممن يحاولون سرقة الثورة:
*حرامى 1: انا ظابط شرطة شريف بس غضبان.. ومن الشعب زعلان عشان أهانونى وقلت أنتقم من الشعب وأسرق ثورتهم وأسيبهم لوحدهم يواجهوا الحراميه والمجرمين عشان يسرقوهم ويهتكوا أعراضهم والبلد تبقى فوضى و يعرفوا قيمتى..أيّكشى تولع!!!!
*حرامى 2 :انا ظابط شرطة فاسد..سرقت ونهبت وأغتصبت وعذّبت ناس أبرياء وقتلت متظاهرين من الثورة عشان احافظ على الناس اللى بتحمينى و بتدفعلى. فلوس و بتعطينى سلطه ونفوذ وحاليا أقوم بترويج الأشاعات ضد شباب 25 يناير عشان الشعب يكرة الثوره
أيّكشى تولع!!!!
*حرامى 3 :انا بلطجى ومجرم وسوابق وبأشتغل مع أمن الدوله و دلوقتى بأنفذ اوامرهم
و بأشتغل قاطع طريق وهّجام..أسرق العربيات والستات وعامل للناس رعب وفزع عشان يطالبوا بعودة نظام مبارك اللى كنا بنأكل الشهد فى عهده. أيّكشى تولع!!!!
*حرامى 4:انا تاجرطمّاع واستغليت ظروف الناس واخفيت الزيت والسكر والرز وكل شويه أرفع أسعارهم عشان أعمّلى قرشين حلوين.. فرصة وجت لحد عندى ما أستغلهاش ليه؟ أيّكشى تولع!!!!
*حرامى 5:انا مسئول كبير فى البلد وشايف كل اللى بيحصل..بس مش قادر أتخذ قرار حاسم
بإعدام المجرمين اللى قتلوا ونهبوا البلد..أصل قلبى حنّين و قلت يمكن يشيلونى و يجيبوا حد تانى يكون قلبه جامد و يتخذ القرارات الحازمه دى...وربنا يستر على البلد.
*حرامى 6: انا مواطن عادى..كل يوم أشوف الغلط و ساكت عنه ولا حتى أعمل ضده أى موقف و لا حتى بأبّلغ عليه قيادات الجيش...أصلى أتعودت أمشى جنب الحيطة.
*حرامى 7:انا نشال أشجع الناس نعمل مظاهرات فئوية عشان الناس تبقى زحمه وأعرف أنشل محافظ المتظاهرين بدل وقف الحال اللى احنا فيه ده.. أيّكشى تولع!!!!
*حرامى 8:انا بأشتغل مع الحزب الوطنى وهمه بيدفعولى فلوس كتير عشان نشجع كل الناس انها تعمل مظاهرات عشان يقف الأنتاج ويقف الشغل ويقف حال الناس والشعب مش هيلاقى ياكل ويضّطروا يقولوا ولا يوم من أيامك يا مبارك. أيّكشى تولع!!!!
*حرامى 9: انا من الحزب الوطنى والثورة دى خربت بيتى ووقف حالى وكل اللى نهبته من الشعب هياخدوه منى..آه..دول بيحاربونى فى قوتى ويا واخد قوتى الحرام..يا ناوى على موتى وعشان كده انا أشارك فى عمل المؤامرات ضد الشعب وضد الجيش عشان نوّقع بينهم و تقوم حريقه فى البلد عشان اغحنا نرجع تانى نهلب ونسرق من تانى .. أيّكشى تولع!!!!
*حرامى 10:انا رجل دين أستغل الظروف لتحقيق مكاسب شخصيه وسياسيه حتى لو أدى الأمر ان الشعب يحرق بعضه و يقتل بعضه..المهم أعمل لى قرشين وأيّكشى تولع!!!!
*حرامى 11:انا رجل أعمال وكنت مظّبط أمورى مع الحزب الوطنى ومظّبط أمورى مع الشرطه والجمارك واستورد مخدرات وسلاح وقمح مسرطن و بذور زراعيه فاسده ومسرطنه و الثوره دى جت وقفت حالى والناس اللى اتعودت على المخدرات أكلت وشى وعشان كده انا شاركت فى موقعه الجمال وكل يوم أعمل مؤامره عشان نسرق الثوره وترجع أيام العز تانى.. أيّكشى تولع!!!!
*حرامى 12 :انا مواطن مش لاقى اللقمه ومراتى كل يوم تردح عشان مفيش فلوس..طيب انا هأعمل ايه بس و البلد كلها حالها واقف..رحت سايب شغلى و عامل مظاهرة فئوية ضد الزوجات النكديه.. أيّكشى تولع!!!!
*حرامى 13: انا كنت مسئول سابق والثورة فضحتنى وكشفت البلاوى اللى عملتها والناس عرفت إنى حرامى وعشان كده أشارك فى عمل المؤامرات عشان الناس تنسى وألحق أهرب الفلوس اللى سرقتها من الشعب ..وعلى ما المسئولين ياخدوا بالهم من الجرائم بتاعتى أكون خلعت على لندن و يبقوا يقابلونى بقا لو عرفوا يمسكونى اوياخدوا الفلوس اللى سرقتها وانا فى لندن.. أيّكشى تولع!!!!
*حرامى 14:انا موقعاتى و مشعللاتى بطبيعتى و أحب انى أضرب آسفين بين االناس عشان الناس تطلبلى شاى وقهوه حاجه ساقعه على حسابهم على القهوه و القعده تحلى.. أيّكشى تولع!!!!
*حرامية 15: انا أحب أفتى فى كل حاجه سواء أعرفها أو ما أعرفهاش وأحب أكون فى محور الأحداث وأمسك التليفون وأتكلم مع الستات صاحباتى وأبلغهم أخبار من تأليفى عشان الدنيا تولع و أقول أكاذيب عن الثوره وإن عصابه جت سرقت البيت وإنهم سرقوا مجوهراتى اللى بالملايين..وطبعا انا ما عنديش دهب أساسا وأوقع بين صاحباتى واجوازتهم وبينهم وبين بعضيهم وأهه أضيع وقتى بدل ما انا قاعده فاضيه لا شغله و لا مشغله .. أيّكشى تولع!!!!
*حراميه 16:انا ست وحشه ومحدش معبرنى من الرجاله وكل شويه أنزل اروح الميدان و أقف وسط الزحمة و اصرخ و أقول إلحقونى..الشباب إتحرش بيا.. عشان الرجاله ياخدوا بالهم منى ويعرفوا انى ست حلوة ومرغوبه وييجى واحد ينطص فى عينيه ويتجوزنى.. أيّكشى تولع لو ما اتجوزتش