لو كل ده جنان...أتجنن

إعلان جديد بس الصراحة لمس الشئ إللى ناقصنا....رموز صغيرة بأفعال بسيطة لكن تأثيرها أ د إيه قوى ومؤثر وتحقق بيها أعظم إنجاز...وهو إزاى تقدر تسعد غيرك.
كلمة. ..ابتسامة... مصلحة تخلصها لحد... تفرج كرب... أو حتى هدية رمزية مش هتكلفك شئ حتى لو مشيت فى الشارع ووزعتها.
من غير سبب وعلى ناس ما تعرفهاش... أشكال السعادة كتير بس إزاى نحسها ونحسس بيها غيرنا هو ده الفرق.
اصح كل يوم وأنت ناوى أنك هتسعد حد النهاردة.. محتاجين نبطل نفكر فى نفسنا وبس تعالوا نجرب نفكر فى غيرنا علشان غيرنا يفكر فينا.
سؤال حائر ما بين واقع وأمنيات لماذا نفعل بأنفسنا أقبح الأشياء وأصبحنا نكره بعضنا البعض ورمينا مصريتنا ونتعامل كالأعداء وكلا منا متربص بالآخر ليفوز بالقاضية.
يا شعب مصر لن يكون هناك منتصر وخاسر لأننا فى مركب واحد وعلينا أن نمسك جميعا بالدفة على قلب رجل واحد لنصل لبر الأمان. ..آما آن الأوان أن يرتفع صوت العمل فوق الكلام وتتصافح الأيدى بدلاً من الاشتباك.
لو أنت موظف عاهد نفسك أنك هتكون وسيلة علشان تسهل للناس مصالحهم مش تعقدهم وتخنقهم.
لو أنت سواق عاهد نفسك مش هتستغل إللى يركب معاك
لو أنت بتشتغل فى أى مجال عاهد نفسك إنك هتراعى ربنا وضميرك.
لو أنت تقدر تساعد حد ساعده من غير ما يطلب منك.
هنثور ونحارب الفساد ونطالب بالتغيير للأفضل دايما بس ده واحنا بنشتغل وننتج ونخاف على بلدنا بجد.
التغيير إحنا إللى هنعمله وهنفرضه ولو بنطالب اللى بيحكمنا أنه يكون أفضل لازم نطالب نفسنا الأول أننا نكون أفضل ولو الدنيا ظلام من حوالينا شمعتك مع شمعتى هتنور تانى الطريق.
لو حاسس إن كل اللى قلته ده جنان تعالوا نتجنن أخدنا إيه من العقل.. اعمل اللى أنت شايفه صح مش اللى الناس هتقولك عليه مش عيب استفتى قلبك ولو افتوك فالقلب وإن أخطأ فهو صائب
لو كل ده جنان اتجنن محتاجين نتجنن ولا عزاء للعقلاء إذا كان العقل بالشكل ده.