أى لغة ممكن تعبر عن اللى حصل؟

تعجز اللغة بكل مفرادتها عن التعبير عما حدث.. عشان كده مش هاكتب بلغة الضاد.. هاكتب باللغة اللى بتتكلم عنها الناس لما نشوف أعضاء طفل برىء متناثرة على قضبان السكك الحديد وييجى أب يلملم جثة ابنه من الأرض لازم لازم تحس بحشرجة فى قلمك وعجز فى صوتك، سارة محمود ومصطفى عز وأحمد حلمى وأروى وهنا وفرحة وأحمد وإخواته ومحمد ومحمود أشرف وهاشم وشيماء ومحمد منصور وأخوها أحمد محمد منصور وحوالى خمسين من زملائهم كانوا بيضحكوا وبيفتكروا درس إمبارح مع بعض والبسمة فى وشوشهم تفرش فدانين أرض.. كانوا رايحين لفصول الدرس يتعلموا زرع.. حصد.. شرب.. صعد.. مستقبل.. حلم.. وطن.. آمال.. أجيال وماكنوش يعرفوا أنهم هايكونوا مجرد اسم فى جرنان تحت عنوان ضحايا الإهمال طب وبعدين.. هاتفضل لحد امتى نحصد أرواح مصريين وتقتل فلذات أكبادنا وولادنا بسبب إهمال مسؤول مش حاسس بالبنى آدمين.. وبعدين؟ من إمتى بنصرخ بنفس الداء.. وكل حكومة وحاكم ييجى يوعدنا بدواء عاجل ودايما لا الدوا بيوصل ولا الحاكم بيوفى بوعده والنتيجة غلابة يموتوا وأطفال فى عمر الورد يروحوا ولا جديد تحت شمس الوطن آه يا وطن.. آه يا كبدى يا بنى، كنت بتضحك بصوت عالى وأنت بتنده يا محمد على أدهم وتقوله هات كراستى مد إيديه بالصفحة البيضة بيعاكسك مديت كفك فجأة لقيته مش وياك ولقيت راسه بره شباك الأتوبيس ومالحقتش تصرخ لأن صوتك راح مع صرخة 50 تلميذ لما القطر الغبى دهس الكرسى اللى عليه الشنطة المليانة كتب وقتل صاحبك والحلم اللى اترسم امبارح وأنتم راجعين متفقين تتقابلوا فى الفسحة وتلعبوا كرة.. نحاسب مين واحنا دايما فى خانة اسمها ضحايا.. وأبدا عمرهم ما يحاسبوا الجلادين؟ نحاسب مين واحنا بلا فخر بنخش موسوعة جينيس الدولية فى ضحايا الطرق.. كلنا فاسدون من أول راس لحد أصغر عامل فى مزلقان كحيان نسيوه من عشرات السنين، أعزائى المشاهدين لا يوجد بلد فى العالم يحدث فيه من الساعة السابعة صباحا حتى الثانية ظهرا هذا الكم من الحوادث حتى فى بلاد الواق واق. اليوم فى مصر قتل بدم بارد عدد 67 فى أسيوط 12 فى الواحات 11 فى الفيوم 5 فى المنصورة 4 فى أسوان 1 فى الإسماعيلية دول اللى وصلوا لوسائل الإعلام حوالى ميت فرد يعنى حوالى خمس أضعاف اللى ماتوا فى حرب غزة.
طيب اللى اتقتلوا واستشهدوا فى غزة ماتوا من عدو واضح عدو أزلى عدو قديم كل العالم بيشهد بعدوانه عدا أوباما طبعا، إنما اللى اتقتلوا عندنا اتقتلوا من إيه.. وعلى إيد مين؟ اتقتلوا على إيد حكامهم مسؤوليهم.. أبناء بلدهم تبقى هنا الجريمة أكبر والإثم أبشع، الرئيس والحكومة والإخوان رفعوا شعار «تطهير الفساد» عظيم.. ما طهرتوش الفساد ليه فى مرفق النقل والمواصلات.. ولا انشغلتوا بتكفير الرافضين للدستور.. والسلفية الجهادية وسب الفنانين وتحطيم أبوالهول والأهرامات انشغلتوا بالسفاسف وسبتوا الناس تموت من الجوع والفقر والقهر والمترو المتعطل والمحروق والقطر البايظ أبوجرار مشقوق منتهية صلاحيته من خمسين سنة أيوه عندنا قطرات من 50 سنة بايظة ومكتوب فيها إنها منتهية من العالم %40 من سكك حديد مصر على الأقل فى قانون السكك الحديدية لا يجب استخدامها.. الإشارات كذلك أجهزة «الإيه تى سى» اللى هيه بتحدد سرعة ومسافة ووقت دخول القطر كل ده بايظ مين سمح بتشغيلها أساسا، أنتوا فاكرين المصريين دول إيه، فيران تجارب جثث مالهاش سعر حرام عليكم.. يا.. مش هاقول يا كفرة لأنى لا أملك أكفر إنسان بس هاقول لابد من إقالة حكومة هشام قنديل، ومش كفاية وزير نقل ولا رئيس هيئة سكك حديد مصر، فى اليابان اللى بيتسبب فى موت فرد واحد بالإهمال من المسؤولين بيمارس حاجة اسمها ال«كيمكازى» أنتو مش هاتعملوا كده عشان الانتحار حرام مع إنكم نحرتم أغلى ولادنا بسبب إهمالكم.. فاكرين أحمد زكى وعاطف الطيب من ييجى أكتر من 20 سنة كان فيه فيلم ضد الحكومة كان فيه مشهد اللى عملوا الفيلم فنانين أرجو من إخواننا السلفيين اللى حرموا الفنون يشوفوا المشهد ده، لأنه كان عن أتوبيس وقطر شوفوه ولو فهمتوه ابقوا اعملوا حاجة.. الله يرحم شهداء مصر!